'European Green Leaf 2024' saria jaso dezake Errenteriak
Ingurumen sari hori jasotzeko hautagaitza aurkeztu zuen udalak apirilean, eta Europar Batzordeak berriki jakinarazi du Errenteriaren hautagaitza onartu duela.
Jose Manuel Ferradas eta Aizpea Otaegi. Errenteria-Oreretak European Green Leaf 2024 ingurumen saria jasotzeko hautagaitza aurkeztu zuen apirilean, eta gaur azaldu dituzte lehiaketa horren eta bidalitako proiektuaren xehetasunak Aizpea Otaegi alkateak eta Jose Manuel Ferradas Ingurumen zinegotziak. Udalerri berdea lortzeko urratsak emateko konpromisoan oinarritzen da hautagaitza hori, eta azken legegintzaldi planean eta oraingoan udala egiten ari den bideari aitortza egiten dio. 2025eko Plan Estrategikoan eta egungo agintaldi planean dago oinarrituta.
Europar Batzordeak berriki jakinarazi dio Errenteriako Udalari bere hautagaitza onartu duela. Orain, Europako beste bederatzi hiriren aurka lehiatuko du ingurumen saria eskuratzeko, denak 20.000 eta 100.000 biztanle artekoak. Honakoak dira lehian ariko diren hiri horiek: Alytus (Lituania), Aulnay-sous-Bois (Frantzia), Bistrita (Errumania), Elsinore (Danimarka), Garges-les Gonesse (Frantzia), Sisak (Kroazia), Grevena (Grezia), Treviso (Italia) eta Velenje (Eslovenia).
Hautagaitza onartua badago ere, Errenteriako Udalak hilaren 20an jakingo du proiektua defendatzera joateko aukera izango duen. Hautatzen dituzten hiri finalista horiek, urriaren 27an Frantziako Grenoble hirian egingo den ekitaldian aurkeztuko dituzte proiektuak, eta egun horretan bertan ezagutaraziko dituzte lehiaketako irabazleak. Garaileak, gainera, 200.000 euroko sari ekonomikoa jasoko du. Finalistek euren komunikazio estrategia aurkeztuko diote Europako Batzordea buru duen nazioarteko epaimahaiari, eta irabazleak, Europako hiri berde izendapeneko urtean zein jarduera burutuko dituzten azalduko du.
Zertan datza lehiaketak?
Pertsona gehienak hirietan bizi dira, eta horrek ingurumen erronka asko gainditu beharra dakarrela azaldu dute udal ordezkariek; hala nola, airearen eta uraren kutsadura, zarata kutsadura, bioaniztasunaren galera, klima aldaketaren areagotzea edota mugikortasuna. Sei arazo horiei irtenbiderik egokienak bilatzeko eta eredugarri izan daitezkeen hiri ekologiko eta jasangarriak daudela erakusteko, 2008an Europako Batzordek European Green Capital saria sortu zuen, eta 2015ean, berriz, European Green Leaf saria.
Sariaren irabazleak mundu osoko hiri enbaxadore bihurtzen dira, eta era berean, egitasmoak gauzatzeko herritarrekin lankidetzan aritzeko ahalegin handia egiten dutenak. Herritarren kontzientzian eragitea bilatzen dela nabarmendu du alkateak, guztion eguneroko erabakiek planetaren eta bertan bizi garenon osasunean eta bizi kalitatean eragin zuzena baitute.
Errenteria 2025 Plan Estrategikoa
European Green Leaf lehiaketara aurkeztutako udal hautagaitza eraikitzeko ikuspegia Errenteria 2025 Plan Estrategikoko hiru erronketatik dator:
- Hiri solidarioa, aktiboa, kohesionatutakoa eta integratzailea.
- Gune naturalei balioa ematen dien eta ingurune iraunkorra bultzatzen duen hiria.
- Konektatutako hiria, irekia eta kanpoko proiekzioaren protagonista dena.
Hiru erronka horiei lotuta, udal hautagaitzak aipatutako planaren ondoko lerro estrategikoei erantzuten die:
- Energia aldetik jasangarria den Errenteria baten alde egitea, energia berriztagarriak sustatuz.
- Oiartzun ibaiak ingurumen kalitate handiko korridore gisa, hiri bizimodua egituratzen du.
- Herritarren artean bizi ohitura osasungarriak sustatzea eta ahalbidetzea.
- Tokiko eta landa eremuko baliabide naturalak babestu eta balioestea.
- Birziklatzen eta baliabide naturalak modu eraginkorrean aprobetxatzean oinarritutako hiri eredurantz aurre egitea.
- Udalerriko mugikortasun hobearen eta iraunkorragoaren alde egitea.
