[Argazki galeria] Errenteria Atletismo Taldeko helduenak, ezin hobe
Klubeko atletak denboraldi biribila osatzen ari dira eta igandeko Gipuzkoako Txapelketetan emaitza onei jarraipena ematen saiatuko dira.
Errenteria Atletismo Taldeko masterrak. Errenteria Atletismo Taldeko (EAT) 16, 18 eta 20 urtez azpiko eta master atletak ezin hobe aritu dira aurten lehian. Master kirolariei dagokionez, kluben arteko aire libreko Espainiako Txapelketan hartu zuten parte. Txapelketa horretan parte hartu ahal izateko, egoera orri bat bidali behar da, eta soilik Lehen eta Bigarren Mailan zortzi taldek lehiatu dezakete. Lehenbiziko aldiz klubaren historian, EATko bi talde masterrak sailkatu ziren txapelketara, emakumeena eta gizonena. Guztira 32 kirolari joan ziren La Nuciara lehiatzera ekainaren 4an, 20 probatan parte hartzeko.
Klubetik azaldu dute txapelketa horietan aurreikuspenak gainditu dituztela. Lesioak eta lan konpromisoak medio, baja batzuekin joan ziren La Nuciara. Emakumeekin laugarren postua lortzea zen helburua, eta gizonekin, berriz, zazpigarrena. Txapelketa aurrera zihoan heinean, ikusi zuten lortzen ari ziren emaitzak onak zirela, eta, azkenean, bi taldeek hirugarren postua lortu zuten. Emaitza horiek mailari eustea ahalbidetu diete.
Espainiako Txapelketan parte hartu zuten EATko atletan hurrengoak dira: Ines Perez, Miguel Harina, Maika Moreda, Jose Mari Zabala, Loreto Lopez, Belen Salvador, Ruben Gonzalez, Esther Estefania, Arkaitz Aginagalde, Angela Gonzalez, Antonio Castro, Dana Romero, Iñigo Egidazu, Ainhoa Romero, Josu Diaz, Ade Rubio, Abel Castañares, Montserrat Mostaza, Alberto Quintano, Leire Castilla, Patxi Riezu, Omar Gonzalez, Lurdes Intxausti, Jesus Zabache, Cris Chueca, Tomas Ruiz, Tomas Sanchez, Laura Comonte, Gemma Garmendia, Monica del Rincon, Emiliano Martin eta Cris Guerra.
16, 18 eta 20 urtez azpikoak
Bestalde, 16, 18 eta 20 urtez azpiko atletek Anoetako mini estadioan egin zen Gipuzkoako Txapelketan lehiatu zuten, eta Maialen Garaiatarbek hirugarren postua lortu zuen 300 metroko proban. Gainontzeko atletak hauek dira: Eneritz Biurrun (100m eta 300m), Onintza Txapartegi (300m), Carlos Mejia (100m), Sara Lozano (100m), Oihane Oianguren (100m) eta Izani Atxega (100m).
Igande honetan, hilak 12, Anoetako mini estadioan gazteen eta masterren Gipuzkoako Txapelketak jokatu dira. EAT taldetik, 14 masterrek eta 16 eta 18 urtez azpiko 5 atletek hartuko dute parte, 19 kirolari guztira.
Horrez gain, master atletak aire libreko bakarkako Espainiako Txapelketak prestatzen hari dira. Txapelketa horiek Tenerifen izango dira, hilaren 17tik 19ra.
Hona hemen Errenteriako Atletismo Taldeak bidalitako masterren zenbait argazki.
