Asteburu oparoa herriko pilotarientzat
Herriartekoan, markagailua irauli eta finalera sailkatu dira herriko palistak. Bestalde, trinketean, bi txapela eskuratu zituzten EPLEko pilotariek.
Taberna eta Chiapuso sari banaketan. Argazkia: Euskadiko Euskal Pilota Federazioa. Asteburu oparoa eta biribila izan da herriko pilotarientzat. Herriartekoan zein trinketean, erronka garrantzitsuak zituzten, eta denetan garaile atera ziren. Herriartekoari dagokionez, Errenteriako paleta eta pala motzeko taldeek markagailua irauli zuten finalerdietako itzulerako partidetan Olaberriako pilotarien aurka, eta finalerako sailkatu dira. Eskisabelek eta Rubenek 35-17 irabazi zuten Olaberriako Arrieta eta Olanaren kontra; eta pala motzean, Yorel eta Abel 40-25 nagusitu ziren Berasategi eta Garridoren aurka. Herriko lau pilotariek maila handian jokatu zuten eta merezitako garaipenak lortu zituzten.
Errenteriako palistek finala jokatuko duten arren, kanporaketa berdindua geratu da (2-2), baina herriko pilotariek 25 tantoko abantailarengatik nagusitu dira. Final handia datorren asteburuan jokatuko da oraindik zehazteko dagoen frontoi batean. Aurkariak Andoaingo palistak izango dira, eta aurreko urteko finala errepikatuko da bi taldeen artean.
Horrez gain, ostiralean, Abadiñon, Trinketeko Euskal Ligako finalak jokatu ziren. Bertan, EPLEko pilotariek bi final jokatu zituzten, eta bietan nagusitu ziren. Eskuz banakako finalean, Aranburuk garaipen argia lortu zuen Zaramaga klubeko Diaz de Herediaren aurka (40-16); eta eskuz binakakoari dagokionez, Tabernak eta Chiapusok 40-26 irabazi zuten Hartzak Leioa taldeko Bikuña eta Uriberen kontra. EPLEko pilotariak bikain aritu ziren bi finaletan, eta bi txapelak eskuratzea lortu zuten.
