Euskadi etorbideko zebrabide bat argiztatu dute udal langileek
Pasaiako Udalak Trintxerpeko Correosen eraikinaren aurreko pasabidean sistema "adimenduna" ezarri duela aditzera eman du.
Euskadi etorbidean, Correosen aurrean, dagoen zebrabidea da argiztatu dutena. 
Pasaiako Udalak Trintxerpeko Euskadi etorbideko zebrabide bat argiztatu du. Zehazki, Correosen aurrean dagoen pasabidea da argi plakez eta sentsore sistema baten bidez hornitu dutena. “Udalerriko bidegurutze jendetsuenetako bat da”, esan dute arduradunek.
Pasabide “adimenduna” hamalau argi plakaz eta sentsore sistema duten bi seinale bertikalez osatuta dago. Azpiegitura itzalita egongo da orokorrean, eta sentsoreek oinezkoren bat edo pasabidearen inguruan mugitzen ari den edozein elementu detektatzen dutenean bakarrik aktibatuko da. Une horretan, zoruko argi plakak eta seinaleak, guztiak, piztuko dira.
Zebrabidearen lerro zurien muturretan ezarritako argiek erlieberik ez dute, “ibilgailuak, txirrindulariak, oinezkoak edo mugikortasun murriztua duten pertsonak igarotzea oztopatzen dutenik”, esan dute udaletik. Ibilgailu astunak eta baldintza klimatologiko txarrak jasateko ere prest dago sistema berria.
