Lezoko tiratzaileak, gorenean
Eskrimako Gipuzkoako Eskolarteko Txapelketaren azken saioan goi-goian izan dira berriz ere Lezoko tiratzaileak.
Atzoko saioko hainbat partaide, tartean lezoarrak direla. Lezoko Eskrima Eskolako kirolariek sasoian azaldutako maila onari eutsi diote atzo (igandea) Donostiako Pio Baroja kiroldegian egindako Eskolarteko Txapelketaren denboraldiko azken saioan. Gipuzkoa osoko 60 parte hartzaile izan ziren bertan, eta lezoarrak gorenean izan ziren.
Haur Mailan, adibidez, Markel Amat izan zen irabazle, eta Eneko Castillo bigarrena. Maila horretan bederatzigarren postua lortu zuen Nico Infantek. Amatek eta Castillok ligako lehen eta bigarren postuak lortu dituzte aldi berean.
Kimu Mailan, Ibai Makibar seigarren izan zen. Benjaminetan, berriz, Ekhi Aiestararenek podiumeko hirugarren koskara igotzea lortu zuen, eta Aratz Aiestaran bosgarren izan zen. Ligan, lehena izan da Ekhi Aiestaran.
Eskolaren arduradunak gustura daude denboraldiak emandakoarekin, nahiz atzoko saioarekin. “Bukaera polita izan da Lezoko tiratzaileen lehen promozioarentzat. Etorkizun handia dute kirol honetan”, azaldu dute. Aldi berean, UDA kanpainaren barruan Bekoerroeta kiroldegian eskrima eskolak egingo dituztela zehaztu dute taldekideek.
