Lizeoko bi ikasleren olerkiak, Urruzuno Literatur lehiaketan garaile
Iraide Mitxelena Rivero eta Jon Esnaola Lopez Pasaia-Lezo Lizeoko ikasleak irabazle izan dira poesia alorreko lehiaketan.
Ezker-eskuin, Jon Esnaola Lopez eta Iraide Mitxelena Rivero. 
Iraide Mitxelena Rivero eta Jon Esnaola Lopez, Pasaia-Lezo Lizeoko Batxilergoko lehenengo eta bigarren mailako (hurrenez hurren) ikasleak, garaile izan dira Eusko Jaurlaritzako Hezkuntza sailburuordetzak antolatu duen 37. Urruzuno Literatur lehiaketan, poesia alorrean.
Aurten, Mikel Ayllon, Gari Berasaluze, Peru Iparragirre, Iratxe Retolaza eta Patxi Zubizarreta idazleak izan dira epaimahaikideak, eta horien erabakiz bost eguneko egonaldi bat emango zaie Mitxelena eta Esnaolari. Irteera horretan, idazketarekin zerikusia duten lanketak egiteaz gain, hainbat euskal artista gertu-gertutik ezagutzeko aukera izango dute ikasleek. Horrez gain, Sagastiberri bilduman ere argitaratuko dituzte euren lanak.
Dena den, itxaron gabe, Lizeoak paperean zein sarean argitaratuko ditu bi idazle gazteen olerkiak, 15. Txanpa Literarioan. Ikasleak oporretara joan aurretik banatuko dugu aldizkaria, udako oporretan zehar horrekin gozatua hartu ahal izateko. Urruzuno Literatur Lehiaketako irabazleen bi lanez gain, bertan, betiko legez, ikastetxeak antolatzen duen Trastamintxo Ipuin eta Olerki lehiaketako irabazleen lanak ere bilduko dituzte, eta baita Lezoko Udal Liburutegiak antolatzen duen OrriBakaR literatura lehiaketako bertoko ikasleen lanak ere.
Denera hamasei idazle gazteren hemezortzi ipuin eta olerki bildu ditu Lizeoak azken Txanpan; Lehen Hezkuntzako hirugarren mailatik hasi eta Batxilergoko bigarren mailako ikasleak arte.
Pasaia-Lezo Lizeoak “zorionik beroenak” adierazi dizkie bertoko ikasle diren bi irabazleei, eta jendaurrean berretsi nahi izan dute literaturaren eta irakurzaletasunaren aldeko “ekintza txiki zein handiak” sustatzen jarraitzeko konpromisoa.
