ETE eta KAEren estropada, igandean San Pedron
Emakumeek Hernaniko I. Bandera izango dute jokoan, eta Kepa Deun Arrantzaleen Kofradia XXII. Ikurrina gizonek.
![](https://oarsoaldea.hitza.eus/site/files/2022/06/dsc0098.jpg)
Datorren igandean, 11:30etik aurrera, ETE eta KAEren estropada lehiatuko da San Pedroko uretan. Emakumeek Hernaniko I. Bandera izango dute jokoan, eta Kepa Deun Arrantzaleen Kofradia XXII. Ikurrina gizonek.
Estropada lau kaletan jokatuko da, sarrera librearekin. ETE ligakoak Donibaneko Nabalaldetik irtengo dira eta hiru luze eta bi ziaboga egin beharko dituzte; KAE 1-ekoek, aldiz, sei luze eta bost ziaboga, San Pedrotik abiatuz. Txanden zozketa ostegunean egingo dute.
Estropada EITBk zuzenean emango du. Hori dela eta, antolatzaile den San Pedro Arraun Elkarteak hainbat eskaera egin dizkio Pasaiako Udaltzaingoari, eta horiei erantzunez, erabaki dute ezingo dela barruti hartako kaian aparkatu igandean, 07:00etatik aurrera, gutxienez 18:00ak arte. Nolanahi ere, lekua husten joan ahala, aparkatzeko baimena emango da.
Hospitalilloko aparkalekua Gudari plazatik hurbilen dagoen gunean aparkatu ahal izateko egokituko da, Esnabiden dagoen hesia irekiz, San Pedroko bizilagunei sarbidea errazteko. Aparkaleku hori ostiraleko 16:00etatik igandeko 18:00ak arte erabili ahal izango da.