Aste honetako mobilizazioen berri eman dute etxez etxeko langileek
Maiatzaren 23tik daude greba mugagabean Pasaiako Etxez Etxeko Zerbitzuko langileak. Datozen egunetako protestekin bat egitera deitu dute.
Aurreko mobilizazio bateko artxiboko argazkia da hau. 
Pasaiako Etxez Etxeko Zerbitzuko langileen greba mugagabeak aurrera darrai. Maiatzaren 23an lanuzteari ekin ziotenetik barruti guztietako kaleak hartzen ari dira, euren egoeraren berri eman eta jendearen elkartasuna galdegiteko.
Aste honetan ere bide beretik jarraituko dute, eta deituriko mobilizazioen berri eman nahi izan dute HITZAn. Atzo kontzentrazioa egin zuten Eulen enpresa kontratatzailearen aurrean, eta gaur manifestazioa nahiz kanpatzea dituzte deituta udaletxearen aurrean. Esan bezala, bizilagunei dei egin diete haiekin bat egin dezaten; horra hor datozen hitzorduak:
- Bihar, osteguna. Manifestazioa Trintxerpetik San Pedrora, eta buelta. Ondoren, Itsasoko etxetik igo eta Ulia ibilbidea eta Azkuene kalea igaroko dituzte, Alkateordetzara iristeko. 10:30ean hasi eta 13:30a aldera bukatzea aurreikusi dute.
- Etzi, ostirala. Kontzentrazioa Eulen enpresaren aurrean, 11:30ean.
- Larunbata, hilak 18. Kanpatzea Antxoko Gure Zumardian, 11:30etik 13:30era.
