[Galeria] Gipuzkoako areto futboleko jokalari onenak pasaitarrak dira
Iosu Monjek sasoiko jokalari onenaren saria jaso du, Eneko Agirregomezkortak golik onenarena, eta Sanpedrotarrak kiroltasun keinuarena.
Iosu Monje (erdian) eskertuta agertu zen Alberto Ferreres Antxo AF-ko presidente (ezkerrean) eta David Hidalgo entrenatzailearekin. 
Joan den larunbatean eman zituzten, estreinakoz, I. Gipuzkoako Futbol Sariak, eta hiru oroigarri banatu zituzten pasaitarren artean: Iosu Monje Chair atxotarra, Eneko Agirregomezkorta Alvarez sanjuandarra eta Sanpedrotarra Futbol Elkarteko Gazteak izan ziren jendaurreko sariak jaso zituztenak.
Ez haiek bakarrik, Jokin Koki Eskisabel errenteriarrari eta Koldo Fernandez Etxarte oiartzuarrari ere egin zieten aintzatespena, emakumeen futbolari emandako hauspoagatik.
Monjeri 2021-22ko Gipuzkoako Futbol Aretoko jokalari onenaren saria bera eman zioten. Sasoi paregabea egin du antxotarrak; horren erakusle, hain zuzen, Antxo AF-ren azken partida (Bigarren B Mailara igotzeko play-offaren finalerdia): taldeak zenbaturiko 6 golak hark sartu zituen.
Zuri-gorrien jokalariak hitza hartu zuen asteburuko ekitaldian: “Eskerrak eman nahi dizkiot federazioari sariagatik, eta baita taldeari ere. Alberto [Ferreres, presidentea] , David [Hidalgo, entrenatzailea], hau zuena ere bada”.
Eneko Agirregomezkorta Alvarez Doni Pari areto futbol taldeko jokalari sanjuandarrari 2021-2022 sasoiko Areto Futboleko Golik Onenaren saria eman zion Gipuzkoako Futbol Federazioak. Aurten Euskal Ligara igoera erdietsi duen taldeko futbolaria eskertuta agertu zen ekitaldian bere taldekideekin.
Denboraldiko kiroltasun keinuagatik saria jaso zuen Sanpedrotarra Kirol Elkarteko Lehen Mailako Gazteen futbol taldeak. Tolosan jokatu zuten partida batean euren atean gol bat sartu zuten, propio, lehenago tolosarrei gol bat sartu zietelako aurkarietako bat lurrean zaurituta zegoelarik. Ikurra jasotzeko oholtzara igo zen Gaizka Varela entrenatzailea.
Emakumezkoen futbolean, bi erreferente
Jokin Koki Eskisabel errenteriarrak urte berezia du aurtengoa, erretiroa hartuko baitu eta aitortza ugari egin baitizkiote azken asteotan. Larunbatekoan ere ez zuten hutsik egin aintzatespen hitzek. Futbol jokalari, entrenatzaile eta kirol zuzendari izandakoak Emakumezkoen futbolaren aitzindariak izendaturiko saria jaso zuen.
Eskisabeli emandako oroigarri bera eman zioten, halaber, Koldo Fernandez Etxarte Oiartzun Kirol Elkarteko presidente izandakoari. Berriki zendu da oiartzuarra, eta hura ere gogoan izan zuen futbol federakuntzak sari-banaketan, emakumezkoen futbolaren alde egindako lanagatik. Haren alargun Lurdesek jaso zuen saria.
Horra hor aipaturiko protagonisten zenbait argazki (Gipuzkoako Futbol Federazioarenak dira).
