Ariguneak osatzeko deia egin dute Euskaraldiaren batzordeek eta Bokalek
Elkarte, enpresa, kirol talde, instituzio publiko zein pribatu, merkataritza edo ostalaritza gune eta abarrek izena eman dezakete jada.
Bokale Euskararen Aholku Batzordeak eta barrutietako Euskaraldiaren batzordeek Arigune izateko deia egin zuten atzo. 
Hirugarren Euskaraldia datorren azaroaren 18an abiatu eta abenduaren 2ra arte egongo da martxan. Data urrun ikus badaiteke ere, dagoeneko hasiak dira euskararen aldeko ariketa prestatzeko aurrelanak, eta horietako bat izango da Ariguneak osatzen hastea.
Elkarte, enpresa, kirol talde, instituzio publiko zein pribatu, merkataritza edo ostalaritza gune… era guztietako entitateek eman dezakete izena, hamabost egunez, euskara gehiago erabili eta hitzez ekiteko guneak sortzeko -hots, Arigune bilakatzeko-. Formulario hau bete beharko dute horretarako.
Ahobizi edo Belarriprest txapa jantzi nahi duten norbanakoek apur bat gehiago itxaron beharko dute 2022ko Euskaraldira batzeko; irailean irekiko da horien izen-emate prozesua. Horri esker, aurreko urteetan bezala, hizkuntza ohiturak euskararen mesedetan aldatzeko ariketa egingo dute Euskal Herri osoko milaka lagunek.
Pasaiako zenbait entitate (ikastetxe, enpresa, euskaltegi, merkatari…) jada izena ematen hasi direla eman dute aditzera arduradunek, eta Bokale Euskararen Aholku Batzordetik eta barrutietako Euskaraldiaren batzordeetatik herriko gainontzeko entitateak Euskaraldian parte hartzera deitu dituzte. Helburua, argia: “Ariguneak identifikatu eta hizkuntza ohiturak euskarara ekartzeko ariketa kalitatez egitean azpimarra jartzea”.
