Astelehenean hasiko da udako denboraldia udal igerilekuetan
Uda gainean da, eta Fanderiako eta Beraungo igerilekuek udako denboraldia hasiko dute astelehenean. Irailaren 11 arte luzatuko da.
Beraungo igerilekuak. Uda gainean da, eta datorren astelehenean, hilak 20, hasiko da udako denboraldia Fanderiako eta Beraungo udal igerilekuetan. Denboraldia irailaren 11n bukatuko da bi igerilekuetan. Errenteriako udal kirol instalazioetan abonaturik dauden bazkideek bi instalazioetarako sarrera abonuaren barruan sartua izango dute. Horrez gain, bazkide ez direnek ere bi eremuetara sartzeko aukera izango dute eguneko sarrerarekin, bost sarrerako bonuekin edo udako denboraldian bi instalazioetara sartzeko aukera ematen duten bonu bereziekin.
Ordutegiak
Ordutegiei dagokionez, Beraungo igerilekua irekita egongo da 10:30etik 21:00etara. Bestalde, Fanderiako igerilekuan eta Galtzarabordako kiroldegian ordutegi aldaketak izango dira. Fanderiako igerilekua 09:00etatik 22:00etara zabalduko da egun guztietan, igande eta jai egunak barne. Gainera, Galtzarabordako kiroldegiko igandeetako ordutegia 08:00etatik 14:00etara izango da ekainaren 19tik irailaren 11ra, biak barne.
Informazio gehiagorako, Fanderiako instalazioetako (943 34 44 23) eta Beraungo igerilekuetako (943 44 96 98) harreretan eska daiteke.
