Erakusketa eta hitzaldiak, kontzentrazio eremuen inguruan
Erakusketa gaur hasi eta hilaren 30a arte egongo da ikusgai Xenpelar Etxean. Horrez gain, hiru hitzaldi antolatu dituzte datozen egunotan.
Kontzentrazio eremuen inguruko erakusketa abiatu du La Ilusion elkarteak. Errenteria-Oreretako La Ilusion kultur taldeak Alemanian, Frantzian, Espainian eta Euskal Herrian ezarri ziren kontzentrazio eremuen inguruko erakusketa bat antolatu du. Erakusketa hori gaur hasiko da, eta hilaren 30a arte egongo da ikusgai Xenpelar Etxean.
Horrez gain, hiru libururen inguruko hitzaldiak antolatu dituzte kontzentrazio eremuen gaia lantzeko, guztiak Xenpelar Etxean, 19:00etan. Lehena bihar izango da, ostirala, eta Carlos Hernandezen Los campos de Franco liburua jorratuko dute. Bigarrena datorren asteartean izango da, hilak 21, eta Fermina Cañaverasen Putas de campo eleberria izango dute hizpide. Azken hitzaldia, berriz, datorren ostiralean izango da, hilak 24, eta Benito Bermejoren Los deportados a los campos nazis liburuaren inguruan mintzatuko dira.
