Anexa dantza konpainiako webgunea martxan du Eresbilek
Julio Duran Anexako dantzari ohiak material oparoa gorde eta sailkatu zuen, eta Eresbili utzi dio webgunea sortzeko.
Pello Leiñena, Harkaitz Millan eta Julio Duran. 1970eko hamarkadan dantza garaikidean aitzindaria izan zen Anexa konpainiako Julio Duran dantzariak jasota zuen dokumentazioa utzi dio Eresbileko artxiboari, eta dagoeneko ikusgai dago Eresbilen webgunean. Gipuzkoako Dantzagunearen bitartekaritzarekin, iragan astean sinatu zuten kontratua Julio Duran dantzariak, Pello Leiñena Eresbileko zuzendariak eta Harkaitz Millan Gipuzkoako Foru Aldundiko Kultura, Lankidetza, Gazteria eta Kirol diputatuak.
Dantza konpainiaren sorreratik, 1970ean, Anexako dantzaria izan zen Duran, eta Anexak 1970 eta 1974 urteen artean estreinatutako 25 koreografiatik, 17ren estreinaldian aritu zen. Hain zuzen ere, aro horretakoa da Duranek jaso zuen material gehiena, baina 1998 arteko dokumentuak ere baditu. Anexan dantzari gisa aritu zen urteetan material oparoa bildu eta sailkatu zuen Duranek, hala nola, argazkiak, negatiboak, inpresiorako plantxak, kartelak edota arropa. Duranek bizitza osoa eskaini zion dantzari. Anexan kide izan zuen Iñaki Landarekin batera dantza akademia bat ireki zuen, eta erretiroa hartu arte bertan izan ziren lanean. Horrez gain, gaur egun dantza garaikidean diharduten egile askoren irakasle izan ziren.
Webgunearen datuak eta ezaugarriak
Duranek emandako materialarekin eta informaziorekin, Anexari buruzko informazio ugari jasotzen duen webgunea eraiki du Eresbilek. Datu historiko asko emateaz gain, 80 argazki baino gehiago dituen galeria osatu dute. Horrekin batera, Anexak estreinatutako 25 koreografiatako bakoitzari orri bat eskaini diote, baita estreinatu gabeko hiruri ere.
Bitxikeria gisa, jakinda garai hartan ikus-entzunezko dokumentuak jasotzea zaila zela, TVE grabatzen ari zen ‘Momentos vascos’ saioaren inguruan Duranek grabatutako bideo bat ere jaso du Eresbilek.
Honakoak dira Duranen Anexaren funtsaren datu nagusiak:
- 4 erantzun koaderno.
- 10 album.
- 4 programa karpetatxo.
- 37 argazki.
- 60 gutun-azal negatiboekin.
- 35 karpeta kartelekin.
- 7 dokumentu txiki.
- 15 inprimatze-xafla.
- 3 jantzi.
- Super-8 film-bobina bat.
