Badator 2022ko Euskaraldia, "hitzez ekiteko garaia"
Irailaren 28tik aurrera irekiko dute aurretik belarriprest eta ahobizi izandakoek aurtengo parte hartzea berresteko epea.
2020ko Euskaraldiko aurkezpen bateko artxiboko argazkia da hau. 
Azaroaren 18a oraindik urrun senti badaiteke ere (egun horretan hasi eta abenduaren 2ra bitarte izango da 2022ko Euskaraldia), dagoeneko hasi dira herriz herri hizkuntz ohiturak astintzeko batzordeak elkartzen.
Joan den astean iragarri zuten entitateek dagoeneko eman dezaketela izena aurtengo ariketan Arigune izateko, eta oraingoz aurreratu dute irailaren 28tik aurrera berretsi ahalko dutela euren parte hartzea aurretik belarriprest edo ahobizi izandakoek.
Bien bitartean, hausnartzen hasteko gonbita egin dute arduradunek: “Joan pentsatzen… Zer lortu nahi duzu aurtengo Euskaraldian? Zein izango da zure erronka?”.
Bestalde, gogora ekarri dute Euskaraldiaren batzordeetako ateak zabalik daudela antolakuntzan parte hartu nahi duenarentzat. Pasaian barrutiz barruti daude taldeak. Horietara batu nahi duena posta elektroniko bidez jar daiteke harremanetan arduradunekin.
