Nafarroako Pirinioetara irteera antolatu du Itsastarrak-ek astebururako
Datozen larunbat eta igandean bi tontor igotzeko gonbita egin du Pasaiako mendi taldeak, Herrerako Mendizaleak taldearekin elkarlanean.
Argazkian, Txamantxoia mendia. Larunbatean igoko dira tontorrera, Linzako aterpetik abiatuz. 
Trintxerpeko Itsastarrak Mendi Taldeak irteera bateratua antolatu du Herrerako Mendizaleak taldearekin, datorren astebururako. Nafarroako Pirinioetako bi tontor igoko dituzte datozen larunbat eta igandean.
Larunbatean Txamantxoia (1.945 metro) igoko dute, Linzako aterpetik (Huesca) Asolazeko kanpinera (Izaba, Nafarroa) iristeko. Ohi bezala, bi ibilbide proposatu dituzte antolatzaileek; ertainak 9 kilometroko luzera eta 210 metroko desnibel positiboa du, eta luzeak, aldiz, 9,5 kilometro eta 600 metroko desnibela.
Igandeko irteera Auñamendira (2.507) egingo dute, San Martineko harritik abiatuta. Ibilbide laburra hautatzen dutenek 4 orduan egingo dute 10 kilometro eta 440 metroko desnibela duen bidea. Luzea nahiago dutenek, berriz, gutxienez ordu eta erdi gehiago emango dute mendian, 788 metroko desnibela eta 14 kilometro osatu beharko baitituzte.
06:30a aldera abiatuko da autobusa Trintxerpetik. Bazkideek 75 euro ordaindu beharko dituzte, eta gainontzekoek 80. Informazio gehiago behar duena Itsastarrak-eko kideekin jar daiteke harremanetan posta elektroniko bidez.
