[Bideoa] 2021ean egindakoen berri eman du Oarsoaldea Garapen Agentziak
COVID-19ak eragindako ezegonkortasun egoerari aurre egiteko urtea izan dela adierazi dute eskualdeko agentziaren arduradunek.
Atzo, astelehenarekin, Oarsoadea Garapen Agentziak 2021eko memoria aurkeztu zuen Lezoko Gezala Auditoriumean. Urteak emandakoak azaltzeko bideoa proiektatu zuten, eta aldi berean, Fernando Nebreda gerenteak aurrez aurre dituzten erronken eta aukeren berri eman zuen. Beheko bideoan ikus daitezke, laburbilduta, Pasaiako, Errenteriako, Lezoko eta Oiartzungo udalak parte diren eta udalerrietako herritarren zerbitzura dagoen erakundeak egindakoak. (Klik egin hemen memoria idatziz ikusteko).
Aurkezpenean izan ziren, Nebredaz gain, eta ordezkari politikoei dagokienez Lezoko alkate Jesus Mari Martiarena, Pasaiako alkate Izaskun Gomez, Oiatzungo alkate Jexux Leonet eta Loreto Osa Pasaiako Udaleko zinegotzi Oarsoaldeko kontseilaria. Aldi berean, garapen agentziako langileen ordezkaritza zabal batek ere parte hartu zuen ekitaldian.
Azalpenetan esandakoen arabera, 2021. urte erresistentzia eta berraktibatze urtea izan zen, COVID-19ak eragindako ezegonkortasun egoerari aurre egiteko. Hala, herritarrei nahiz enpresei begirako berreraikitze eta berraktibatze dinamikak areagotu egin dituztela jakinarazi zuten, bideoan ikus daitekeenez. Gainera, eragileen arteko lankidetza esparruak sendotzeko bideak zabalik izan dituztela jakinarazi zuten agerraldian.
Ekitaldiaren bukaeran, Fernando Nebredak nabarmendu zuen pertsonak, Oarsoaldeko herritarrak direla euren zereginaren ardatza. Eta hori aurrera eramateko duten konpromiso eta profesionaltasunagatik eskerrak eman zizkien garapen agentziako langile guztiei.
