Atlantikaldiko lehen artistak iragarri dituzte
Tanxugueiras, Kolinga, Les Amazones D'Afrique, Albany, España Circo Este eta Palmerita Coco Blue dira talde horiek.
Iker Tolosa, Aizpea Otaegi eta Maite Gartzia. Atlantikaldia martxan da, eta antolatzaileak gogor ari dira lanean kultur topagune eta musika jaialdiaren IX. edizioa prestatzeko. Aurtengoa irailaren 15etik 18ra izango da, eta ohiko izaera eta formatuarekin berreskuratuko dute, herriko kaleak berriz hartuta. Egun horietan oholtzara igoko diren taldeen izenak iragartzen hasi da Errenteriako Udala, eta gaur goizean eginiko agerraldian zenbaiten izenak eman dituzte jada Aizpea Otaegi alkateak, Maite Gartzia Kultura zinegotziak eta Iker Tolosa Atlantikaldiaren zuzendariak.
Taula gainean ariko diren lehen artista konfirmatuak Tanxugueiras, Kolinga, Les Amazones D’Afrique, Albany, España Circo Este eta Palmerita Coco Blue dira.
Aurtengo edizioa ‘Itsas Kodeak’ lelopean egingo da, eta Aizpea Otaegik lelo hori aukeratzearen arrazoiak azaldu ditu: “Herri ezberdinen arteko elkar ulermenerako erabili izan diren lengoaia unibertsala dira itsas kodeak, eta Atlantikaldiak nortasuna badu, urte hauetan guztietan eraiki dituen lengoaia komunei esker lortu du. Sorkuntza, musika, dantza, artea eta eragileen arteko elkarlana dira Atlantikaldiaren hizkuntza unibertsala, kulturen arteko elkarbizitza ahalbidetzen eta sustatzen dutenak”.
Jaialdiak lau gune izango ditu
Atlantikaldiak irauten duen egunetan, lau gune nagusietara eramango dituzte emanaldiak: Lehendakari Agirre plaza, Panier, Herriko plaza eta Foru plaza, nahiz eta ibaian eta herrian zehar ere egitasmoak antolatuko dituzten. Aurtengoa herriko txoko ezberdinetan jaialdiarekin bat egitearen sentsazioa berreskuratzeko ekitaldia izango dela baietsi du Maite Gartziak: “Kalean dabilen jendeak, ezustekoan bada ere, jaialdia topatzea nahi genuke, antolatutako ekintzekin gozatzeko”.
Egitarau osoa irailean iragarriko badute ere, “diziplina askotariko edukiz betetako programa” antolatu dutela aurreratu du Gartziak, “nazioarteko sortzaileen eta herriko elkarte ezberdinen proposamenekin osatutako lau eguneko programazioarekin”.
Horrez gain, musika ikuskizunak ‘Itsas Elkarrizketen’ bidez aberastuko dituztela zehaztu du Iker Tolosak: “Jatorri anitzetako sortzaileak harremanetan jartzea du xede egitasmoak, nazioartekoak eta bertakoak, eta inoiz batera taularatu gabeko emanaldiak eskaintzea ahalbidetzen du honek. Dagoeneko jaialdiaren bereizgarri nagusienetako bat bilakatu dira”.
