Lezoko kirol guneetako langileak: iritsi da akordioa
LAB sindikatuak jakinarazi duenez, BPXport enpresak eta Lezoko kirol guneetako langileek hitzarmena sinatu dute.
BPXporten eta langileen ordezkariak, hitzarmenaren sinatze ekitaldian. Borrokaldiak merezi izan du. LAB sindikatuak iragarri du Bekoerrota kiroldegiko eta Altzate igerilekuko langileek lan itun propioa izango dutela. “Langileen lan baldintzak hobetzeaz gainera, galdutako erosmen ahalmena berreskuratuko dute. Egindako borrokaren ondorioz garaipena lortu dute”, adierazi dute sindikatutik. Langileek BPXport enpresarekin (Lezoko kirol gune horiek kudeatzen ditu) egin dute akordioa. Baina LABek zehaztu du Lezoko Udalaren lana ezinbestekoa izan dela akordioaren egikaritzean, hori sustatzeko interlokuzio lanagatik eta ekimenagatik. 34 langilek egite dute lan herriko bi kirol instalazio horietan.
Lau urte eta bederatzi hilabeterako akordioa da sinatu berri dena. Hala, horren barruko atalik nabarmenetakoa da langile guztiei aplikatuko zaielako Gipuzkoako Titulartasun Publikoko Kirol Instalazioen hitzarmena, horrela, langileen artean zegoen soldata eta lan baldintza arrakalarekin bukatuko delarik, denen lan baldintzak homologatuz.
Bestalde, soldaten igoera izango dute, 2012tik horiek izoztuta izan ondoren. Hala, 2022ko maiatzaren 1etik 2026. urtera arte, urteroko soldaten igoera KPI+%1ekoa izango da; 2026ko urtarrilaren 1ean soldaten igoera hori egunekoekin alderatuz %20koa ez bada, hori gaindituko da portzentai horretara iristeko. “10 urteetan galdutako eros ahalmena berreskuratzea ahalbidetzen die langileei honek”, esan dute LABetik.
Bestelakoan, langileek zeregin propioetarako ordaindutako egun bat hartu ahal izango dute, eta bajen kasuan, soldataren %100a jasoko dute langileek eri dauden bitartean.
Langileek eta enpresak sinatu berri duten hitzarmenean lortutako baldintzak “ezinbestekoak” zirela ebatsi du LABek, “langile hauek bizi duten prekarizazioa gainditzeko hastapeneko pausoak direlako”. Altzateko eta Bekoerrotako langileek borrokaldi luzea egin dute euren lan baldintzen alde, hasieran barne mailan, eta 2022a hastearekin batera herrira begira ere.
