Lezoko Ikastolaren jolastokian eraberritze lanak egingo dituzte
530 metro koadroko azalera izango duen estalkia jarriko dute, eta aldi berean jolaserako eremu berria sortuko dute.
Estalkiaren irudim orokorra. Pasaia-Lezo Lizeoaren Lezoko egoitza nagusian eraberritze lanak egingo dituzte udan. Horien asmoa da bertako jolastokiaren erdia-edo estaltzea, eta aldi berean jolaserako eremu berria sortzea. “Gaur egun hormigoizko pista soila denari itxura aldatzea da asmoa, ikasleentzako eremu askoz atseginagoa eta naturalagoa sortuz”, adierazi dute hezkuntza zentrotik. Horrela, haurrek jolaserako aukera gehiago izango dituzte eguraldiaren nondik-norakoen menpe egon gabe.
Estalkia 530 metro koadro ingurukoa izango dela azaldu du Pasaia-Lezo Lizeoak, hau da, egungo patioaren erdiaren adinako espazioa estaliko dute metalezko egitura (metakrilatozko piezekin osatua) izango duen azpiegiturarekin. Baina hori ez da dena: estalkiaren barrualdeko zati bat berdegune bihurtuko dute, zuhaitz eta guzti, egurrez egindako orekarako gailuekin. Albo batean, Tipi bat ere jarriko dute
Lizeotik jakinarazi dute jada abian direla lanak, eta espero dutela abuztuaren bukaera aldera den-dena erabiltzeko prest izatea, hau da, ikasleak oporralditik bueltatzerako prest izatea. Estalkiaren kostua 400.000 eurokoa da, eta horren barruan joango den jolas-eremu eta berdegunearena 24.000koa. Lezoko Udalaren laguntza izango du ikastetxeak lanen kostuari aurre egiteko.
Estalki berriaren barruko jolas eremua.
Aspaldiko eskaera
Lizeotik adierazi dute ikastolako erabiltzaileen aspaldiko eskea zirela abuztuaren bukaera aldera egikarituko diren lanak. Ikasleekin jarduera gehiago egiteko aukera izango dela ziurtatu dute. Aldi berean, ikastolako ordutegitik kanpo herritarren erabilera librerako eremu izaten jarraituko du gune horrek, udalarekin egindako hitzarmenari esker.
Lizeoaren Lezoko eraikinean 300 bat ikasle izaten dira ikasturtero, Lezokoak eta hezkuntza eragilearen barruan dauden gainontzeko ikastoletakoak. Hala, 0-5 adin tartekoez gain, LH1 eta LH2ko ikasleak ere jasotzen ditu herriko eraikinak.
