Eider Perez eta Iban Illarramendik irabazi dute Etxepare saria
Perez idazlearen eta Illarramendi ilustratzailearen 'Kiratsa' lanak irabazi du album ilustratuen sariketaren XVI. ekitaldia.
Eider Perez eta Iban Illarramendi, 2022ko Etxepare sariaren irabazleak. [Argazkia: Pamiela etxea]. 
Eider Perez idazle pasaitarrak idatziriko eta Iban Illarramendik ilustraturiko Kiratsa album ilustratuari eman diote XVI. Etxepare saria. Orotara 35 lan aurkeztu zituzten lehiaketara, eta epaimahaik hobetsirikoa udazkenean aterako du argitara Pamiela etxeak.
Liburuak usain onei eta txarrei buruzko gogoeta egiten du, arkakuso baten abenturak ardatz. Miren Asiain ilustratzaileak, Idoia Sobrino liburuzainak eta Patxi Zubizarreta idazleak osatutako epaimahaiak testua “album baterako ezin hobea” dela nabarmendu zuten saria ematerakoan, eta testuaren eta ilustrazioen arteko uztarketa, “goi mailakoa”.
