Bina atxilotu eta inputatu, asteburuan, Pasaian
Antxon gizonezko bat inputatu eta beste bat atxilo eraman dute. Beste bi gertakari izan dira Donibane eta Trintxerpen ere.
Azken egunotan izandako zenbait gertakariren berri eman du Pasaiako Udaltzaingoak. Bi norbanakoren atxiloketetan parte hartu du Pasaiako Udaltzaingoak asteburuan, eta beste bi inputatu ditu. Gertakarietako bi Pasai Antxon izan dira, eta bana Donibanen eta Trintxerpen.
Lehenengo gertakarian emakume bat izan zen atxilo eraman zutena, Donibanen herritar bati eraso egin izana leporatuta, hark (erasotuak) kotxearen antena lapurtu ziola aurpegiratuta.
Bigarren atxiloketa Antxon eman zen, Ertzaintzaren eskutik. Udaltzainek lehen horiei laguntza eman zietela eman dute aditzera. Barruti horretan izandako ustezko borroka baten ondorioz egin zuten esku-hartzea. Agenteek esan dute atxilotutakoak eraso egin ziela.
Barruti horretan bertan, Luzuriagako aparkalekuan kasu horretan, beste gertakari bat eman da azken egunotan. Udaltzaingoa gizonezko bat ikertzen ari da zabalgune horretan aparkatutako auto bati nahita kalteak eragin izanagatik.
Azkenik, kamioi gidari bat ere ikertzen ari da polizia, trafiko segurtasunaren aurkako ustezko delitu batengatik. Aditzera eman dute Trintxerpen gertatutako trafiko istripu baten ondoren “ez zuela alkoholemia proba egin nahi izan”.
