Etxean utzi du Pasaia Kayakek Euskadiko Kopako Itsas Kayakeko urrea
Badian lehiaturiko proban lehen izan dira pasaitarrak, taldekako sailkapen orokorrean. Haurren Espainiako Kopan ere onena eman dute.
Talde pasaitar osoa, Trintxerpen, garaipenak emandako garaikur eta dominekin. 
Denboraldiko taldekako lehenengo garaipena lortu zuen Pasaia Kayakek iragan igandean badian bertan lehiaturiko Itsas Kayakeko XVII. Euskadiko Kopako proban. Zumaiako Itxas-Gain taldearen kontra “lehia estua” izan zutela aitortu badute ere, gailentzea lortu zuen marea urdinak.
12,4 kilometroko ibilbidea bete behar izan zuten palistek, irteera eta helmuga Torreatze zutelarik. Ibilbidearen zati handiena kanpoaldean bete zuten, lau luze eta hiru ziaboga, zehatzago esanda. Txema Yarza klubaren arduradunaren arabera, ia 2 metroko sakonerako itsasoak “gogortu eta zaildu egin zuen kirolarien lana”, azken tartean bereziki, ipar-mendebaldeko haizea bortiztu zenean.
Talde zumaiarreko kirolariek azkarren egin zuten emakumeetan (Maite Etxaberekin) nahiz gizonetan (Oier Aizpuruarekin), baina pasaitarrek maila hobea eman zuten, orobat, kategoria guztietan, taldekako sailkapenerako puntuak pilatuz.
Ion Carballo izan zen urdinen apusturik handiena Senior gizonen garaipena lehiatzeko, baina ezin izan zuen ezer egin Aizpuruak itsasoan erakutsitako nagusitasunaren aurrean. Bigarren postuari eutsi eta atzetik izan zuen Carballok Antton Araneta taldekidea, podiuma osatuz, ordubeteko langaren azpitik.
Ioar Alonso meritu handiz burutu zuen proba Kadeteen kategorian, taldeari baliagarri izango zitzaizkion puntuak eskuratuz. Txema Yarzak ere brontzezko domina lortu zuen Beterano Masterren artean, eta gainerako taldekideen lan onari esker pasaitarrek gaipena etxean utzi zuten talde-palmaresean.
Haurren Espainiako Kopa
Prestatzaileek ez dute alde batera utzi Gaizka Lopezek eta Oinatz Alonsok Haurren Espainiako Kopan (ipar-eremua) Trasonan (Asturias) egindako lana. Ia 100 palista izan ziren proba bakoitzean, 3.000 metroko ibilbidearekin, eta Lopezek top-10ean sartzea lortu zuen A kategorian; Alonso, aldiz, B kategoriako 20 onenen artean sailkatu zen.
Marea urdinak indartsu jarraitzen du, ur lasaitan zein itsasoan.
