Lezoko Emakume Taldea: "Gure ekimena izan da aterkiena"
Udaletxean ortzadarraren koloreekin aterkiak jarri zituzten atzo. Hori haien iniziatiba izan zela zehaztu dute Lezoko Emakume Taldekoek, ez udalarena.
Lezoko Emakume Taldeak (LET), atzoko LGTBIQ+ Pertsonen Eskubideen Nazioarteko Egunaren harira, hainbat zehaztapen egin nahi izan ditu. Emakume lezoarrek adierazi dute ortzadar koloreko aterkiak jartzearen iniziatiba haien ekimenez sortu zela. Izan ere, atzo udalak egunarekin bat egiteko hedabideetara bidalitako oharrean ez zen azaltzen norena izan zen ortzadar aterkiak jartzearen ideia. “Ohar horretan zerbait falta dela uste dugu. Lezoko Emakume Taldearen aipamena gutxienez Gure ekimena izan da aterkiena, eta zuzen erabakia udaletxeko balkoian jartzea, inongo adostasunik gabekoa”, esan dute taldekideek.
Gainera, ortzadar aterkien iniziatibarekin aurrera egiteko udalaren partetik trabak izan dituztela jakinarazi dute Lezoko Emakume Taldekoek. Haien hasierako ideia zen Kale Nagusiko goialdean jartzea aterkiak, hango eraikinetako teilatuetatik jarritako soketan zintzilik, “baina ezezkoa jaso genuen”. Guardasol koloretsuak Atzekoateko iturrian edota faroletan jartzeko proposamenari ere udalak uko egin ziola esan dute LETekoek. “Horregatik, larunbatean, Harrobira zetorrela aprobetxatuz, aterkiak ipini genituen Ibai Ondon”.
