Antxoko jaiengatik, zenbait trafiko aldaketen berri eman du udaltzaingoak
Luzuriagako aparkalekua ia guztiz okupatuko dute barraka eta ferietako txosnek. Kale nagusietako batzuk, bestalde, itxita egongo dira.
Luzuriagako aparkalekua ia guztiz okupatuko dute barraka eta ferietako txosnek. 
Heltzear dira Antxoko San Fermin Jaiak, eta ohi bezala, Luzuriagako eremuan barraka eta ferietako txosnek lur hartuko dutenez, ezin izango da balizaturiko eremuan aparkatu datorren asteleheneko 08:00etatik, hilaren 13ra bitarte.
Jaiek barrutiko kale nagusiei ere eragingo diete: Kupeldegi eta Blas de Lezo arteko Hamarretxeta kalean ezin izango da aparkatu hilaren 6ko 09:00etatik, hilaren 11ra bitartean. Bertan jarriko dituzte jaietako saltoki postuak.
Antxoko jaiek dirauten bitartean barrutian egokitu eta seinaleztatu diren aparkaleku hauetan utzi ahalko dira ibilgailuak:
- Hilaren 7tik (osteguna) aurrera, futbol txapelketa bukatu ondoren, Usozeko kirol-eremuan aparkatu ahal izango da.
- Luzuriagan, libre geratzen den eremuan, bertakoentzako aparkalekua egokituko da.
Bestalde, hilaren 6tik 11ko 07:00ak arte Antxoko kale hauetatik ezin izango dute ibili era guztietako ibilgailu motordunek: Hamarretxeta, Zumalakarregi, Oarso eta Gure Zumardia.
Herriko sarrerak berdin mantenduko dira, baina trafiko perimetrala ezarriko da kale hauetatik: Eskalantegi, Luzuriagako aparkalekuaren perimetrala, Gelasio Aranburu, Blas de Lezo eta Maiatzaren Lehena. Kale horietan noizbehinka mozketak egin ahal izango direla ohartarazi du udaltzaingoak, jaietako hainbat jardueratarako (buruhandiak, danborradak, etab.).
Herritik ateratzeko bideak, berriz, honakoak izango dira: Papineko bidea, Luzuriaga-Gelasio Aranburu-Oarsoko biribilgunea, edo Blas de Lezo. Poliziak ohartarazi du hesituriko eremuetan aparkatutako autoei isuna jarriko zaiela, eta garabiarekin erretiratuko direla horiek.
Eragozpenengatik barkamena eskatu dute. Informazio gehiago behar duena haiekin jar daiteke harremanetan 943 00 43 00 telefono zenbakiaren bidez.
