Bihar irekiko ditu ateak 'Argien Mendeko moda eta ohiturak' erakusketak
Lau hilabetez egongo da irekita. XVIII. mendeko Emakumezkoen jantziak ikusgai egoteaz gain, bisita antzeztuak eskainiko dituzte ere.
Maria Antonieta erreginaren jantzien erreplika baita azalpenak ere izango dituzte eskura herritarrek. Bihar, larunbata, Jantziaren Zentroak ateak irekiko dizkio “Argien Mendeko moda eta ohiturak” doako erakusketari. Izan ere, datozen lau hilabeteetan bisita antzeztuak eta orduko ohiturei buruzko azalpenak eskainiko dituzte. Erakusketa Kapitain etxearen sarreran egongo da.
Erakusketa honen bidez interesdunek hiru mende atzera egin eta Versalleseko Jauregiko “Ispiluen Galerian” sartu ahal izango dira. Bertan, emakumezkoen bederatzi soinekoren erreplikak egongo dira; artean, Maria Antonieta erregina izandakoaren hiru. Hortaz gain, hainbat gairen inguruko azalpenak jasoko dituzte errepliken alboan kokatuko dituzten testuek: emakumezkoek janzten zituzten jantziak, oinetakoak, makillajea, orrazkera, etab. Era berean, erakusketan zenbait margolan egongo dira ere, XVIII. mendeko emakume protagonista irudikatzen dituztenak.
Bisita antzeztuak nahi duenarentzat
Erakusketarekin batera, Jantziaren Zentroak bisita antzeztuak eskainiko ditu zenbait egunetan, zazpi euroren truke. Hala, 1783. urteko udako festa antzeztuko dute. Parte hartzaileek gorteko protokoloak ezagutuko dituzte, eta “Ispiluen Galerian” nola jantzi ikasiko dute ere.
Egunok uztailaren 16a, abuztuaren 20a, eta irailaren 4a zein 23a izango dira. Ordubeteko hiru txanda antolatuko dituzte, gaueko 20:00, 21:00 eta 22:00etan. Izena aurretik eman beharko da, Jantziaren Zentroaren helbide elektronikora idatziz edo 943 49 45 21 telefonora deituz (Turismo Bulegoa).
