Udal gobernua: "Etxez etxeko langileak Eulen enpresakoak dira"
Udal gobernuak zenbait argibide eman ditu etxez etxeko zerbitzua ematen duten langileen grebaren gainean. "Ahal dugun guztia egiten ari gara".
Atzoko ezohiko udalbatzarrean agerraldia egin zuten etxez etxeko zerbitzuko langileek. 
Pasaiako Etxez Etxeko Arreta Zerbitzuko langileak greban daude joan den maiatzaren 23tik. Egoera ikusita, eta greban dauden langileek eta sindikatuetako ordezkariek Pasaiako Udalari egindako eskaerak kontuan izanik, udal gobernuak zenbait azalpen eman nahi izan ditu. Horra hor, hitzez hitz:
- Etxez Etxeko Arreta Zerbitzua ez da udal langileen bidez ematen; lehiaketa egiten du udalak, eta egun zerbitzu hori Eulen Servicios Sociosanitarios S.A. enpresak du esleitua. Beraz, langile horiek Eulen enpresako langileak dira, eta ez Pasaiako Udalekoak.
- Pasaiako Udalak ezin du inolaz ere lan-hitzarmenik sinatu langile horiekin, Eulen enpresaren eta langileen ordezkaritza sindikalaren artean sinatu beharko dute.
- Udal hau legez ahal duen guztia egiten ari da egoera hori desblokeatzeko, baita zubiak eraikitzen ere bi aldeen artean, guretzat funtsezko zerbitzua delako, eta uste dugulako gure nagusiek babestuta eta ondo zainduta egon behar dutela.
Horregatik guztiagatik, enpresa esleipendunari eta langileen sindikatu-ordezkaritzari eskatzen diete negozia dezatela, eta ahalik eta lasterren akordio batera irits daitezela. “Egoera desblokeatu dadin; kalitatezko zerbitzua eman ahal izateko, eta erabiltzaileen eta langileen eskubideak bermatu ahal izateko”.
