Autobusen aferan, Ezker Anitza-IUk ere zerbitzua indartzea eskatu du
Pasaiako barrutientzat, hiru proposamen egin ditu: E07aren ibilbidea mantentzea, eta bai honetan bai E08 zein E09an maiztasuna handitzea.
Ezker Anitza-IUk alegazioak egin dizkio Gipuzkoako Foru Aldundiari. Hainbat alderdi politikok bezala, Ezker Anitza-IUk alegazioak egin dizkio Gipuzkoako Foru Aldundiari, azken honek datorren hamarkadan zehar autobus zerbitzuak mantentzeko hartutako erabakiaren aurrean. Pasaiako barrutiei dagokienean, hiru proposamen zehatz egin ditu koalizioak.
Alde batetik, San Pedro eta Donostiako ospitaleak lotzen dituen E07 linearen ibilbidea ez dadila aldatu eskatu du. Izan ere, gaur egun San Pedro, Antxo eta Trintxerpetik igarotzen bada ere, aldundiak Antxoko geralekuak bertan behera uztea proposatu du. Hortaz gain, Ezker Anitza-IUk maiztasuna handitzea eskatu du ere, orduan bi zerbitzu bermatzearren.
Bestetik, E08 linearen maiztasuna (San Pedro-Trintxerpe-Donostia) handitzea eta orduero bi zerbitzu eskaintzea eskatu dute. Gaur gaurkoz, 50 minutuan behin abiatzen da autobus bat linea honetan. Hirugarrenik, astean zeharrerako E09 (San Pedro-Donostia) lineak ordu erdian behineko maiztasuna izatea eskatu du, erabiltzaileek lanetik bueltan zerbitzu hobea izan dezaten.
Bukatzeko, Ezker Anitza-IUren arabera, garraio zerbitzu publikoa enpresa publiko bidez eskaini beharko litzateke bere osotasunean, eta lekurik ez utzi enpresa pribatuen kudeaketari.
