Pontika eta Galtzarabordako erretiratuen elkarteetako obrak, kontrataziora
Errenteriako Udalak lehentasunezkotzat hartu du obrak egiteko beharra, eta 400.000 euro bideratuko dira horretarako.
Pontikako auzoa. Legegintzaldi honetan Errenteriako Udalak adinekoen bizi-kalitatea hobetzeko hainbat proiektu abiatu ditu. Ekintza horien artean honakoak bideratu dira: nahi ez den bakardadeari buruzko diagnostikoa; Aholku Batzordean Adinekoen Mahaia abiatzea; adinekoentzako tutoretzapeko etxebizitzetan egiten ari den lana; eta erretiratuen klubak eta Acoge taldeak (zailtasun kognitiboren bat duten 70 urtetik gorakoentzako taldeak) dinamizatzen urtean inbertitzen diren 100.000 euro baino gehiago.
Pontika eta Galtzarabordako erretiratuen kluben obrak ez zeuden Agintaldi Planaren barruan, baina, hala ere, lehentasunezkotzat jo ditu udalak, eta lan horiek egiteko beharra zegoela baloratu da. COVID-19ak eta bi obrek suposatzen zuten inbertsio handiak eragotzi egin dute orain arte egitea. Obrek 400.000 euro inguruko aurrekontua izango dute.
Obra garrantzitsuak
Lan horiek, espazio motagatik eta egingo diren esku hartzeengatik, aurrekontu handia behar duten obra garrantzitsuak dira; izan ere, gerakinetik 196.000 euro bideratu dira haiek egiteko zegoen partidan txertatzeko.
Pontikako klubari dagokionez, erabat berrituko da espazioa, sukaldea eta taberna barne, ondoren taberna horren ustiapena lehiaketara ateratzeko. Galtzarabordan, berriz, espazioa ere erabat eraberrituko da.
