Madalenek badute egitaraua: zabala eta askotarikoa
Bihar eta ostirala artean eskuratu ahal izango da herriko hainbat guneetan. Digitalean eskuragarri dago jada Herri Biziaren webgunean.
Itziar Ostolaza, Aizpea Otaegi, Elixabete Murua, Maite Gartzia eta Isaac Palencia, Herriko plazan. Madalenak gainean dira, eta bi urteko etenaldi derrigortuaren ondoren, indartsu datoz. Egun gutxi geratzen dira herriko jaiek txupinazoarekin eztanda egiteko, eta udal ordezkariek gaur egin dute egitarauaren aurkezpen ofiziala Herriko plazan.
Lehenik, Aizpea Otaegi alkateak hartu du hitza, eta jairik gabe igaro ditugun bi urteren ondoren, “aurtengoak desio eta irrika bikoitzarekin” hartuko ditugula adierazi du. Horrez gain, madalenen zentzu sinbolikoari dagokionez, jaiek “komunitatea birsortzeko ezinbestekoak” direla nabarmendu du, “herri honekin eta elkarrekiko dugun konpromisoa berritzeko egunak” baitira.
Era berean, alkateak baietsi du madalenak hiru baliorekin eta zutaberekin estuki lotuak daudela: partaidetza, konpromisoa eta zaintza. Partaidetzari dagokionez, “herriko pertsona eta eragileen inplikazioa” azpimarratu nahi izan ditu. Herriko jaien egitaraua jai batzordeak osatzen du, eta Otaegik eutsi du eragileen ekarpenik gabe “ezinezkoa” litzatekeela programazio “anitza eta askotarikoa” osatzea.
Konpromisoa ere oso presente dagoen zutabea dela aipatu du alkateak: “Herri hau konpromisoaren gainean eraikita dago. Madalen jai hauetan omenduko ditugun Arrats eta Ekintza BIBE elkarteak konpromiso horren adibide garbia dira. Gure jendarteko pertsona eta kolektibo zaurgarrienen eta askotan ikusezin direnen alde, finean, herri honen kohesioaren alde, egiten duten lanari aitortza kolektiboa da izango duten omenaldia”.
Azkenik, zaintzaren balioa nabarmendu nahi izan du Otaegik, eta “askatasunean, berdintasunean eta aniztasunean gozatuko” diren festen aldeko aldarria zabaldu du, “begi bat norberaren gozamenean jarrita, eta bestea ingurukoenean”. Horrez gain, “erasoek inolako tokirik” izango ez dutela azpimarratu du. Horren harira, “erasorik gabeko madalenen aldeko lanketa berezi bat” egin dutela azaldu du, datozen egunetan xehetasunekin aurkeztuko dena.
Egitarauaren ildo nagusiak
Aizpea Otaegik egin duen moduan, Maite Gartzia Kultura zinegotziak jai batzordearen eginkizuna nabarmendu nahi izan du: “Elkarte ugari aritu dira aurten ere lanean adin guztietarako egitarau zabal eta anitza prestatzeko. Udalaren eskutik joan dira, baina lan gogorra egin dute egitaraua osatzeko”.
Urtero egiten den bezala, hilaren 21eko txupinazoa modu ezberdinetan bizitzeko aukera egongo dela azaldu du Gartziak. Alde batetik, hiru txupinazo antolatu dira: umeentzako mila koloreko txupinazo txikia, Holi txupinazoa eta betiko txupinazoa. Bestetik, betiko txupinazoa Herriko plazan bizitzeaz gain, Zumardian jarritako pantaila erraldoian edo Herri Biziaren webgunean streaming bidez jarraitzeko aukera ere egongo da.
Eskainiko den musika programazioa ere zabala eta askotarikoa izango dela nabarmendu du zinegotziak, herriko gune ezberdinetan gozatu ahal izango dena.
Programa, paperean eta digitalean
Madalenetako programak bihartik aurrera eskuratu ahal izango dira herriko hainbat guneetan. Bihar eta ostirala artean, hilaren 13tik 15era, 10:00etatik 13:00era, egitarauak banatuko dira udaletxeko arkupetan. Horrez gain, Lekuona Fabrikan Galtzaraborda, Fanderia eta Beraungo kirol instalazioetan eta gainontzeko udal eraikinetan ere eskuratu ahal izango dira, eta Oarso aldizkariarekin ere banatuko dute. Guztira, 9.400 ale argitaratu dituzte paperean.
Digitalean, berriz, Herri Biziaren webgunean eskuragarri dago dagoeneko egitarau osoa.
Azkenik, madalenak aske disfrutatzeaz gain, herritarrek jaiak nola bizi dituzten partekatu nahi badute, traola bat bideratu dela azaldu du Gartziak. #Madalenak2022 traola erabiliz, herritarrek sare sozialetara argazkiak, bideoak edo txioak igotzea animatu dute, madalenen kontakizun kolektiboa eraikitzeko.
