Madalenetako Haur Krosa bueltan da
Hilaren 24an, igandea, izango da, 12:00etan, Koldo Mitxelena plazatik abiatuta, eta aurten zendu den Javier Ormaetxea omenduko dute.
Marta Barea eta Elixabete Murua. Bi urteko etenaldi derrigortuaren ondoren, bueltan da Batzokiko Kirol Elkarteak antolatzen duen Madalenetako Haur Krosa, eta gaur goizean aurkeztu dute Elixabete Murua EAJko bozeramaileak eta Marta Barea EAJko kideak. Aurtengoa ‘XIII + 2’ edizioa izango dela eutsi dute antolatzaileek, “pandemiak eragindako bi urteko nahitaezko etenaldi hori nolabait irudikatu nahi izan” baitute.
Madalenetako Haur Krosa hilaren 24an, igandea, izango da, 12:00etan, eta hiru mailatan lehiatuko da: 2013 eta 2014 urteen artean jaiotako haurrak edo gazteagoak; 2011 eta 2012 urteen artean jaiotako kimuak; eta 2009 eta 2010 urteen artean jaiotako infantilak.
Ibilbideari dagokionez, ohikoa izango da. Koldo Mitxelena plazan hasiko da, Batzoki aurrean. Bertatik Xenpelar eta Madalen kaletik igaroko da, eta Koldo Mitxelena plazan bukatuko da. Gaztetxoenek eta kimuek itzuli bat egingo dute, eta infantilek, berriz, bi bira emango dizkiote ibilbideari.
Izen-emateak krosaren egunean bertan egingo dira Batzokiaren aurrealdean, 10:00etatik aurrera.
Antolatzaileek urtero kirol elkarte edo kirolari bat omentzen dute. Aurten Javier Ormaetxea omenduko dute, Batzokiko Kirol Elkartearen “alma materra” izan dena. Ormaetxea aurten zendu da, eta hari omenaldia egingo diotela aurreratu du Elixabete Muruak: “Aurtengo edizioa oso berezia izango da, merezitako omenaldia eskainiko baitiogu Javier Ormaetxeari. Azken urteetan, pilota izan du ardatz nagusi, haur eta gazte mailan. Oarsoaldean eta Bortzirietan Javier Ormaetxearen hutsunea nabarituko da”.
Errenteria-Oreretako EAJko ordezkariek haur guztiak animatu nahi izan dituzte plaza bete eta krosean parte hartzeko. Horrez gain, alderdikide eta Ormaetxearen lagunei omenaldian parte hartzeko gonbidapena luzatu diete.
Azkenik, EAJko ordezkariek herritarrei madalenez “gozatzeko” deia luzatu diete: “Herritarrek madalenez gozatzea nahi dugu, azken bi urteetan gozatu ezin izan ditugun ekitaldietan parte hartuz, zuhurtziaz baina pozez eta alaitasunez. Eta, bereziki, herritarren segurtasunaren eta sexu-erasoen aurkako protokoloei, adi”.
