Xenpelar Tailerren 2022-2023 ikasturteko eskaintza aurkeztu dute
Helduei zuzendutako 50 ikastaro bideratuko dira, diziplina ezberdinetakoak. Izen-emateak irailaren 5etik 16ra egin beharko dira.
Maite Gartzia Xenpelar Tailerren aurkezpenean. 2022-2023 ikasturteko Xenpelar Tailerrek eskainiko dituzten ikastaroak aurkeztu ditu gaur goizean Merkatuzarren Maite Gartzia Kultura zinegotziak. Helduei zuzendutako 50 ikastaro izango dira guztira, pinturan, zeramikan, argazkigintzan, egur taillan, altzarien zaharberritzean eta patchwork diziplinetan murgilduko direnak. Ikasturte osoko eta lauhileko ikastaroak egongo dira, eta astean 2 eta 6 ordu bitarteko ikastaroak antolatu dira. Horrez gain, pandemia aurreko normaltasun egoerara itzuliko dira aforoei dagokionez.
Eskainiko den eskaintza berriari erantzuteko, tasak eguneratu dituztela azaldu du Gartziak, eta duela hilabete batzuk Errenteriako Udalak iragarri bezala, Xenpelar Tailerretan errentan oinarritutako fiskalitatea aplikatuko den zerbitzuetako bat izango da. Hori dela eta, tasak norberaren gaitasun ekonomikoaren arabera zehaztuko direla baietsi du Kultura zinegotziak.
Tasa maximoak zehaztu dira ikastaro bakoitzeko iraupenaren arabera eta gaitasun ekonomikoaren araberako tasa aplikatzeko eskaera eredu normalizatuan egin beharko da, bertan adieraziko den dokumentazioa aurkeztuz. Ondoren, ebatziko da.
Matrikulak, irailean
Ikastaroen matrikulazio epea irailaren 5etik 16ra izango da, eta bi modutan egin ahal izango da: online Kultura Kreaktiboaren webgunean edo presentzialki. Aurrez aurre egin nahi dutenek ZU! herritarren arreta zerbitzuan eman beharko dute beharrezko informazioa, irailaren 12tik 15era. Horretarako, hitzordua eskatzea beharrezkoa izango 943 44 96 00 edo 010 telefono zenbakietara deituta, irailaren 7 eta 15a bitartean.
Interesdun guztiek plaza lortzeko aukera bera izan dezaten, plaza horien esleipena zozketa bidez egingo da eskaera kopurua plaza kopurua baino handiagoa den ikastaroetan. Hori dela eta, izen-emateak ez du plaza bermatuko.
Informazio guztia Xenpelar Tailerren webgunean edo 943 44 96 35 telefono zenbakira deituta eskura daiteke.
