Aste honetan Gure Zumardia hesitu eta Azoka botako dute
Gaur goizean hasi dira plaza ixten, eta datozen egunetan berdina egingo dute Hamarretxeta kalean. Azoka egunotan eraitsiko dute.
Gaur goizean ekin diote plaza hesiz inguratzeari. 
Heldu dira topoa lurperatzeko obrak Antxo erdigunera; gaur goizean bertan hasi dira Gure Zumardia hesitzen, eta datozen egunetan botako dute Azoka. Udal arduradunek aurreratu dute aste honetan bertan ekingo diotela, halaber, Hamarretxeta kalea ixteari, Azoka parean dagoen saihesbidea estali eta trafikoarentzako egokitu ondoren.
Aipaturiko lanengatik, zenbait aldaketa nabarmen emango dira barrutian: batetik, Azoka eta Gure Zumardiaren inguruan dauden elbarrientzako hiru aparkalekuak ezabatu eta Oarso kalera lekualdatuko dituzte; eta bestetik, plaza nagusiko kioskoa kenduko dute behin-behinean (lanak bukatuta berrezarriko dute egungo lekuan).
Hesiak Ibaiondoko zabalgunera arte helduko dira, izan ere, bypass bat egingo da Molinao errekan, itsasadarraren azpian tunel bat eraikitzeko, Errenteria-Oreretarantz irteera gisa. Era berean, Antxoko geltokiari jarraipena ematen dion tunel faltsua egikaritzeko, errekaren ibilgua behin-behinean desbideratu beharko dute.
Geltoki berria Eskalantegi, Zumalakarregi, Biteri plaza eta Hamarretxeta kaleen artean egongo da. Oinezkoentzako sarbidea Eskalantegi kalean egongo da, eta igogailu bat ezarriko dute plazan, elizaren ondoan. Larrialdi-irteera, berriz, San Markos kalean egongo da.
Datozen hilabeteak
Gaurtik hasi eta datozen 21 hilabeteetan, geltokiko lanak gainazalean egingo dira. Epe hori pasata, berriz, aurreikusi dute lanekin lauza azpian jarraitzea, gainean plaza urbanizatua geldituko delarik. Gure Zumardiaren azalera ia bikoiztu egingo da, Azokaren egungo orubea zabalgune bihurtu nahi baitute (nahiz eta larrialdietarako irteeraren etxola bertan egon beharko den).
Azkar batean hustu behar izan dituzte Azoka etxe zuten elkarteek euren egoitzak. Alkartasuna Dantza Taldeak, esate baterako, herri deialdia egin zuen herenegun material guztia lekualdatu ahal izateko. Eraitsiko den eraikina euren jardueretarako erabiltzen zuten elkarte gehienen jarduna Eskalantegi kaleko 45. zenbakira eramango dutela azaldu dute udal arduradunek. Lokal hori Visesari erosi dio berriki udalak.
Dena den, argi utzi dute mudantza hori behin-behinekoa izatea nahi dutela, etorkizunean jarduera horiek Luzuriagako bulego zaharren eraikinean kokatu ahal izatea baita asmoa. Bertan gizarte eta kultur zentro bat sortu nahi du udal gobernuak.
