[Elkarrizketa] "Ilusio handia egiten dit nire herriko jaiak aurkeztu ahal izatea"
‘Zazpitan’ kartelarekin irabazi du madalenetako kartel lehiaketa, eta herrikoa izanik, ilusio berezia egin dio saria eskuratzea.
Angel Blanco 'Zazpitan' kartel garailearekin. Zer suposatzen du zuretzako zure kartelak madalenak iragartzeak?
Txapelketa asko irabazi ditut hemendik kanpo, baina ilusio berezia egiten didana herrikoa da. Ikasten ari nintzela, madalenetakoa izan zen irabazi nuen lehen lehiaketa, eta ilusio handia egin zidan. Horrez gain, madalenak intentsitate handiarekin bizitzen ditut, eta ilusio handia egiten dit nire herriko jaiak aurkeztu ahal izatea.
Nondik datorkizu ‘Zazpitan’ kartela sortzeko ideia?
Egiten ditudan karteletan estilo ezberdinak jorratzen saiatzen naiz, eta aurten letrekin jolasteko gogoa nuen. Horren harira, letrek garrantzia handia dute kartelean, eta letra horiek madalenetako zeinu eta ideia esanguratsuekin irudikatu ditut. Esaterako, udaletxeko fatxada irudikatu dut txupinazoko momentuan, eta erabili ditudan koloreek Xanti eta Maialenekin dute zerikusia.
Zein da kartelaren esanahia?
Letra batek udaletxeko arkupea sinbolizatzen du, balkoia eta suziria ere bertan daude, eta dena Xanti eta Maialenen koloreekin. Ez nuen dena esplizitua izatea nahi, baina argi nuen jendeak madalenetako elementuekin, txupinazoarekin eta herriarekin lotzea nahi nuela.
Sari ugari ari zara lortzen azken urteetan. Ohitzen ari zara…
Madalenetako lehiaketa hamarretan irabazi dut. Kartelak egitearena nire lanaren zati bat da, baina egunerokoan oso gutxitan murgiltzen naiz gai horretan. Niretzako zaletasun bat ere bada, eta ikasten nuenetik beti izan dut gogoa kartelak sortzeko. Urtean lauzpabost egiten ditut. Hiriburuei dagokienez, Bilbokoa da zintzilik dudan bakarra, Gasteizkoa, Donostiakoa eta Iruñekoa irabazi ditut dagoeneko; baina, dudarik gabe, herrikoa izanik, niretzat madalenetakoa da denetan garrantzitsuena.
