Erasoen aurkako neurriak aktibatuko ditu udalak madalenetan
Errenteriako Udalak erasoen aurkako lanketa abiatuko du madalenetan. Horretarako, sentsibilizazio kanpaina berritu eta hainbat zerbitzu jarriko ditu jaietan herritarren eskura.
Elixabete Murua, Itziar Ostolaza, Aizpea Otaegi, Maite Gartzia eta Montse Luis. Errenteriako Udalak eraso sexistarik eta LGTBIfobikorik gabeko jaien aldeko lanketa jarriko du martxan madalenetan. Hori dela eta, udalak madalenak askatasunean bizitzeko deia egin eta neurriak hartu ditu, eta gaur goizean eman dute protokolo eta neurri horien berri Aizpea Otaegi alkateak eta alderdi politiko guztien ordezkariek.
Alde batetik, sentsibilizazio kanpaina berritu dute; eta bestetik, zenbait zerbitzu jarriko dituzte martxan herritarrek bertara jo dezaten beharra izanez gero. “Sentsibilizazio kanpainaren xedea da espazio publikoan presentzia izatea eta herritarren artean kontzientzia piztea”, azaldu du Aizpea Otaegik, “baita erasoen aurrean esku-hartzeko pautak eskaintzea ere, lehen pertsonan erasoa jasandako kasuetan, zein eraso baten lekuko izandakoetan”.
“Askotariko erasoak ikusaraztea da kanpainaren beste helburuetako bat”, zehaztu du Otaegik. Bertatik dator sortu den lelo nagusia, hari egiten baitio erreferentzia: ‘Ez bazaude eroso, erasoa da’. Horrez gain, “erdigunean jartzen du inork ez duela eskubiderik pertsona bat nola sentitzen den zalantzan jartzeko; baita eraso baten erantzulea erasotzailea denaren ideia ere”, baietsi du Errenteria-Oreretako alkateak.
Jaiei begira aktibatuko den kanpaina mugimendu feministako kideekin, jai batzordeko zenbait eragilerekin eta Ostari ostalarien elkarteko ordezkariekin batera osatu du udalak, modu kolaboratzailean.
Herritarren eskura egongo diren zerbitzuei dagokionez, honakoak ezarri ditu udalak:
24 orduko telefono zerbitzua
Uztailaren 21etik 31ra, biak barne, 24 orduko telefono zerbitzua aktibatuko da. Jai egunetatik harago joango dela azaldu du Otaegik, “erasoak ez direlako beti momentuan salatzen”. Telefono hori doakoa eta erabat konfidentziala izango da, eta artatzea psikologo batek egingo du beti, profesionalak egongo baitira beti deiaren atzean.
Telefono zerbitzuaren helburu nagusiak informazioa eta orientazioa eskaintzea, laguntza psikologikoa ahalbidetzea eta erregistroa burutzea direla zehaztu du Otaegik. Azken ideia horren xedea da “madalenetan jazotako eraso anitzen erregistroa osatzea, gertaerak ezagutarazi ahal izateko, argazki zehatza edukitzeko. Jaietan gertatzen dena jakitea ahalbidetuko digu, eta datozen urteetan kanpainak eta zerbitzuak hobeto zehazten lagunduko digu”, eutsi du alkateak.
Horrez gain, larrialdien kasuan, SOS Deiaken 112 telefonora edo udaltzaingoaren 092 telefonora deitzea aholkatu dute udal ordezkariek.
Indarkeria sexistarik gabeko gunea
Aurtengo jaietarako, lehen aldiz, orientaziorako eta informaziorako gune presentziala aktibatuko du udalak. Irekita egongo den ordutegian laguntza eskaintzen eta euskarri informatiboak banatzen murgilduko dela azaldu du Otaegik. Gune hori Foru plazan kokatuko da, eta bi profesional egongo dira lanean honako ordutegian:
- Uztailaren 21, 22 eta 24an: 18:00-02:00.
- Uztailaren 23an: 11:00-02:00.
Erantzunen aurrean erantzun publikoa Mugimendu Feministaren eskutik
Urtero egin ohi den bezala, udalak bat egingo du herriko mugimendu feministak eraso baten aurrean erantzun publikoa artikulatzeko sortu duen protokoloarekin eta berau gidatzeko protagonismo osoa mugimenduari emango dio.
Gaueko autobus zerbitzu indartua
Jaietarako bi linea berri aktibatuko dira gaueko autobus zerbitzua herriko auzo guztietara bideratzeko helburuarekin, ordueroko frekuentziarekin. Ohiko geltokiez gain, erdi bidean geltoki berriak izango dituzte bi lineek, eta Itziar Ostolaza Berdintasun zinegotziak tarteko geltoki horiek sortzeko arrazoiak azaldu ditu: “Helburua da bakoitza bere etxetik ahalik eta gertuen uztea eta trantsitu seguru horiek ahalbidetzea”.
- G1 linea: Irteerak 23:00 – 00.00 – 01:00 – 02:00 – 03:00 – 04:00 – 05:00. Ibilbidea: Aralar plaza, Pontika, Beraun etorbidea, N. Almandoz, Koldo Mitxelena, Urbia plaza, Parke kalea, Urdaburu kalea, Murumendi kalea, Anbulatorioa, Alaberga 53, Alaberga 75, Versalles, Sorgintxulo 11, Portua, Nafarroa etorbidea 75.
- G2 linea: Irteerak 23:20 – 00:20 – 01:20 – 02:20 – 03:20 – 04:20 – 05:20. Ibilbidea: Nafarroa etorbidea 75, Gabierrota, Lartzabal 1, Arragua, Erramun Astibia, R. Maria de Azkue, Gaztelutxo, Agustinak 4, E. Salaberria 6, Markola 41, Markola 25, Markola 3, Agustinak 15, Hijas de la Cruz, Zentolen 1, Zentolen 2, Zamalbide tailerrak, Sagardiburu 1, Sagardiburu 2, Egiburuberri, Zamalbide bidegurutzea, Masti-Loidi, Arramendi, Pontika, Beraun etorbidea, N. Almandoz, Koldo Mitxelena, Urbia plaza, Aralar plaza.
Udaltzainen salaketa bulego ibiltaria
Udaltzainen salaketa bulego ibiltaria Zubiaurre zubian kokatuko da, Aurrera tabernara eramaten duen zubian. Lehen aldiz ezarriko dute, eta helburua da “askotariko gertaeren aurrean herritarren laguntza eskatzera edo salaketa jartzera joateko kokapen finko eta gertukoa izan dezaten”, nabarmendu du Otaegik.
Honako ordutegia izango du zerbitzuak:
- Uztailaren 21etik 24ra, biak barne, 20:00-02:00.
Igogailuak 24 orduz martxan
Lehenbizikoz, herriko igogailu guztiak martxan jarriko dira egun osoz, 24 orduz, herritarren mugikortasuna errazteko, bereziki, auzoen arteko bide irisgarri eta seguruak ahalbidetzeko.
Udalak jaietarako aktibatu dituen neurriez harago, Aizpea Otaegik nabarmendu nahi izan du “guztion ardura” dela madalenak ondo joatea eta “jende guztiak ondo pasatzea inolako deserosotasunik edo erasorik jasan gabe”: “Zaintza hori guztion artean egin behar dugu. Hauek tresna lagungarriak dira, baina azken finean, guztion ardura da dena betetzea”.
