[Erreportajea] Arrats eta Ekintza BIBEri aitortza madalenetan
Laguntza behar duten pertsonak artatzen dituzten elkarteak dira. Ziur azaldu dira omendu izateak euren jarduna aitortzen eta bistaratzen duela, eta pozik daude errekonozimenduarekin.
Aizpea Otaegi alkatea eta Eñaut Gracia Gizarte Zerbitzuetako zinegotzia, Arrats eta Ekintza BIBEko ordezkariekin udaletxean. Bi urteko etenaldi derrigortuaren ondoren, madalenak gainean dira, eta indartsu datoz. Egun gutxi geratzen dira herriko jaiek txupinazoarekin eztanda egiteko, eta ohikoa den bezala, madalenetako omenduek izango dute txupinazoa jaurtitzeko ohorea. Aurten laguntza behar duten pertsonak artatzen dituzten bi elkarte omenduko dituzte, herri kohesioa eraikitzen laguntzen dutenak: Arrats eta Ekintza BIBE. Urte asko igaro dira bi elkarteek euren ibilbidea hasi zutenetik, eta omendu izateak ibilbide horiei aitortza egitea dakarrela azaldu dute Arratseko Jose Mari Larrañagak eta Ekintza BIBEko Jose Antonio Barcenillak.
Arratsek 25 urte daramatza lanean. Larrañagak aipatu du proiektuaren hastapenean kartzelan zegoen jendea laguntzen hasi zirela, eta bide horretatik abiatuta, kale gorrian dagoen jendea artatzen hasi zirela, «pertsona horiek baitira askotan kartzelan bukatzen dutenak». Arratsek lan sakona egiten du bazterketa eta zaurgarritasun egoeran dauden pertsonei babesa eta sostengua emateko, eta argi dute euren egitekoa: «Gure helburua da egoera txarrean dagoen jendeak norbait alboan izatea; ez bakarrik gizarteratzen laguntzeko, baizik eta haien ondoan egoteko».
Ekintza BIBE, berriz, 1994an abiatutako proiektu bati jarraipena eman zion elkartea da. 28 urte dira herrian gogor lanean daudela. «Gehienbat ludopatia eta bestelako mendekotasun psikologikoak dituzten pertsonen errehabilitazioa tratatzen lan egiten dugu», baietsi du Barcenillak. Astelehenetik ostegunera bideratzen dute euren jarduna, arratsaldetan, Errenteriako Udalak Alabergan utzi zien lokal batean. Barcenilla argi mintzo da euren egitekoaz: «Bizitzan nahastu diren pertsonei aukera bat ematen saiatzen gara, jokorik gabeko bizitza berri bat izan dezaten. Horrez gain, erakutsi nahi dugu bizi daitekeela guk eta gure familiek sufritu duguna jasan gabe».
Elkarteak, oso pozik
Txupinazoa botatzeko bi egun geratzen direnean, elkarteak unea iristeko «irrikan» daude. Arratseko Jose Mari Larrañagak onartu du «poz handia» izan dela elkartearentzat omendu izatearen errekonozimendua jasotzea, are gehiago aitortza nola etorri den ikusita: «Guk lagundutako Errenteriako jendea izan da gure ibilbidea aitortu nahi izan duena, eta oso pozik gaude horrekin. Gure lanean askotan gauzak latzak dira, eta ikusten duzunean jendea aurrera doala, bere bizitza egiten ari dela eta zutaz oroitzen dela, poz handia ematen du».
Ekintza BIBEko Jose Antonio Barcenilla ildo beretik mintzatu da, eta aitortu du omendu izatea «sorpresa atsegin» bat izan dela eta «oso pozik» daudela: «Urte asko daramatzagu Errenterian lanean, eta ilusio handia egin digu gutaz oroitu izanak. Errekonozimendu honek gure jarduna bistaratzen lagunduko du, eta garrantzitsua da guretzako jendeak jakitea herrian sufritzen duen jendea laguntzeko elkarte bat dagoela, eta hemen gaudela behar duenari laguntza emateko».
Horrez gain, Barcenillak nabarmendu du artatzen dituzten pertsona asko errenteriarrak direla, eta egoera «ilusio handiarekin» bizitzen ari direla. Gainera, Ekintza BIBEko kideak zehaztu du «garrantzitsua» dela jakitea «mundu guztiak baloratzen» duela egiten ari diren lana: «Denek ulertu dute omenduak izateko arrazoiak genituela, eta hori guretzat oso garrantzitsua da. Egiten dugun lanak balio duela, eta aitortua dela jakitea izugarria da guretzat».
