Gazte eta emakumeek haien lekua izango dute xanistebanetan
Abuztuaren 5ean Gazteen Eguna izango da, eta antolatzaileek zenbait ohar zabaldu dituzte. Gainera, OAFk egitarau propioa antolatu du jaietarako.
Atzo, astelehena, 2022ko Xanisteban Jaien egitarau orokorraren berri eman zuten. Egunez egun, talde ezberdinei begirako programa osatu dute udalak eta herriko zenbait eragilek. Hala, abuztuaren 5a, ostirala, gazteen eguna izango da. Antolakuntza lanetan murgilduta daude dagoeneko, eta zenbait ohar luzatu nahi izan dituzte.
Izan ere, datorren uztailaren 28an, ostegunean, kamiseta banaketa egingo dute arratsaldeko 17:30etan. Horren ostean, 19:00tan, koadriletako arduradunekin bilera egingo da, arduren azalpena egiteko. Hortaz gain, ordainketak egiteko bi modu zehaztu dituzte. Alde batetik, kamisetak jasotzerako unean, koadrila osoari dagozkion kamiseta kopuruaren zenbatekoa zehatz emanda; eta bestetik, aurrez ordainketa transferentzi bidez eginda, beranduenez hilaren 27an. Horretarako, koadrilako arduradunaren izena kontzeptuan jarri beharko da, kamiseta kopurua adierazi, eta dirua ES22 3035 0126 68 1260048618 IBAN kontu korrontera bidali behar da.
Emakumeek ere, haien egitarau propioa
Oiartzungo Asanblada Feministak egitarau propioa antolatu du ospakizunetarako. Artean, agerraldia (hilaren 2an, arratsaldeko 18:30etan), bazkari beganoa, edo bertso saioa antolatu dituzte (hilaren 4an, 14:30 eta arratsaldeko 17:00etan, hurrenez hurren). Gainera, txosna feminista egongo da jaietan, eta protokoloren nondik norakoak zabalduko dituzte QR kode bidez. Jarraian, egitarau osoa ageri duen kartela:
