Pasaian bizikleta hartu eta Lezon bueltatu; edo alderantziz
Lezo eta Pasaiako udalek hitzarmena sinatu dute bi herrietako bizikleten mailegu sistema osagarri bihurtzeko. Abuztuan egongo da martxan.
Jesus Mari Martiarena Lezoko alkatea eta Izaskun Gomez Pasaiako alkatea, gaur goizean. 
Lezo eta Pasaiako udalek hitzarmena sinatu dute bi udalerrietako bizikleten mailegu sistema osagarri bihurtzeko. Akordioari esker, erabiltzaileek aukera izango dute bizikletak herri batean jaso eta bestean uzteko.
Gaur goizean eman dute saiakeraren berri Lezoko alkate Jesus Mari Martiarenak eta Izaskun Gomez Pasaiako alkateak, Pasai Donibaneko Arizabalo Jauregian. Asebete agertu dira bi udalburuak, sinetsita sistema berriak bultzada emango diola mugikortasun iraunkorrari, bereziki lezoarren eta sanjuandarren artean.
Pasaian 2016tik dago martxan bizikleten mailegu zerbitzua, eta Lezon, ordea, estreinakoz eskainiko dute ibilgailuak alokatzeko aukera, alboko herriarekin modu osagarrian, gainera. Zehatzago, abuztuaren 22tik aurrera hartu ahalko dira bizikletak Lezon, eta egun horretan bertan, esan bezala, Pasaian ibilgailua jaso dutenek udalerri batean edo bestean bueltatzea erabaki ahalko dute.
Aplikazio informatikoa
Zerbitzuaren erabilera errazteko asmoz, eta ibilgailuak non hartu eta buelta daitezkeen (bilketa edo entrega guneak) zehazteko aplikazio informatiko bat diseinatu dute Pasaiako Udalaren enkarguz. Tresna teknologikoa bi udalerrietako erabiltzaileek baliatu ahalko dute.
