Bi urre Pasaia Kayakentzat Gipuzkoako Itsas Kayakeko Txapelketan
Maila handia erakutsi dute marea urdineko palistek K-1 eta K-2 probetan. Lortutako dominekin, bigarren izan da taldea sailkapen orokorrean.
Aritz Araneta eta Iñaki Fernandez Zumaiako itsasadarreko kai-muturretik sartzen, garaipenaren bila. 
Iragan larunbatean jokatu zen Zumaiako uretan Gipuzkoako Itsas Kayakeko Txapelketa, kadete mailatik beteranoen mailarainoko kategoria guztietan. Bertan Izan Zen Pasaia Kayak, eta txukun aritu ziren taldeko palistak maila handieneko bi kategoria lehiatuenetan, gizonezko K-1 eta K-2 probetan, hain zuzen ere.
Santiagoko hondartzatik irten ondoren Sakonetan eman behar zuten ibilbideko ziaboga bakarra parte hartzaileek, eta Zumaiako itsasadarrean, kirol portuaren parean, izan zuten helmuga, 11 kilometro pasatxoko distantzia bete ondoren. Itsasoa bare zegoen, aldeko olatutxo txikiekin Sakonetaraino; beroak are gehiago gogortu zuen proba.
Bakarka
K-1ean, Oier Aizpurua zumaiarra zuen taldeak faborito nagusi, eta ez zien inolako aukerarik eman bere aurkariei, ia hasieratik atera baitzituen guztiak uberatik. Lander Rodriguez pasaitarra izan zen haren olatuan gehien iraun zuena, eta behin galdutakoan, ondo baino hobeto eutsi zion bigarren postuari seniorren sailkapenean eta sailkapen absolutuan, atzetik zituen lehenengo beterano arriskutsuei begirik kendu gabe, 53 minutu eta 24 segundoko denborarekin helmugaratuz.
Lana biribiltzeko, Antton Araneta taldekideak ere oso proba ona egin zuen, hirugarren postua eta brontzezko domina lortuz senior mailan, ur lasaietako probetan espezialista dire Martín Egaña eta Unai Azkune zumaiarrak gaindituta.
Binaka
K-2an, Aritz Aranetak eta Iñaki Fernandezek osatutako bikote pasaitarrak bere nagusitasuna erakutsi zuen, hasi eta buka. Argi eta garbi garaitu zituzten zumaiarrek aurkeztutako ontzi guztiak, eta 50 minutu eta 8 segundoko denborarekin probako ontzirik azkarrena izan zen haiena. Distira handiko urrea pasaitarrentzat.
Domina gehiago
Ioar Alonsok eman zien bigarren urrea pasaitarrei nesken kadete mailan, bere lana txukun burutuz, eta meritu handikoa eta aipagarria, halaber, Iker Lizasok junior mailan lortutako zilarra, ur lasaietan aurretik izan ohi dituen aurkariekin lehian. Itsasoan, aldiz, bare egon arren, Haritz Aizpurua zumaiarrak soilik gainditu zuen, 37 segundoko aldearekin.
Gainerako taldekideen lanari esker, bigarren izan zen Pasaia Kayak Gipuzkoako Txapelketako sailkapenean, Zumaiako Itxas-Gain talde garailearen atzetik, eta Hondarribiko Arroja taldearen, Donostia Kayak eta Donostiako ATSS taldeen aurretik, bost lehenengo postuetan.
Datorren asteburuan, hitzordu hirukoitza: Euskadiko Itsas Kayakeko Txapelketa eta Bidasoko jaitsiera larunbatean, eta Urola Ibaiko igoera-jaitsiera igandean.
