Bihartik aurrera, partida ugari Agustina Otaolan
Eskuz binakako Zuloaga eta palako Etxeberria Memorialen finalak jokatuko dira asteburuan. Guztira lau lehia egongo dira, maila ezberdinetakoak.
Salaberria eta Zezeaga, 2019ko Zuloaga Memorialeko txapeldunak. Alkartasuna eta Ondarra elkarteek antolatzen duten eskuz binakako J. A. Zuloaga XXVI. Memorialaren azken finalak jokatuko dira bihar Agustina Otaola pilotalekuan. Promesen eta elite mailakoen finalak izango dira biharkoak, 18:00etan hasiko dira, eta sarrera doan da. Finalerdietako partidetako lau bikoteen errendimendua ikusita, bi final lehiatu aurreikusten dira. Honakoa da biharko norgehiagoken karteldegia:
- Promesak: Senar-Apezetxea / J. Alberdi-Lazkoz.
- Elite maila: E. Labaka-M. Lizeaga / Etxezarreta-Garmendia.
Etxeberria Memorialeko finalak
Eskuz binakako partidez gain, asteburu honetan ere EPLEk antolatzen duen Joakin Etxeberria XXVII. Pala Memorialaren finalak jokatuko dira Agustina Otaolan. 23 urtez azpiko eta senior mailetako palisten finalak izango dira honakoak. Igandean lehiatuko dira, hilak 24, 17:30ean hasita, eta sarrera doan da. Honakoa da igandeko pala partiden karteldegia:
- 23 urtez azpikoak: X. Alkorta-Anatz / Leproux-Duple.
- Seniorrak: Eskisabel-Ruben / Zumeta-Yorel.
EPLEko palisten parte hartzea zabala da final horietan. 23 urtez azpiko mailan klubeko, Anatz pilotaria ariko da; eta senior mailako finalean, berriz, Herriartekoan txapeldun izan diren Eskisabel, Ruben eta Yorel.
