Hiru eguneko plana, Itsastarrak eta Herrerako Mendizaleak taldeen eskutik
Larunbatetik astelehenera bitarteko irteera antolatu dute mendi taldeek, Asturiasko printzerrira: ibilaldi bat eta bi tontor.
Idiaren begia, Peña mea. 
Pasai Trintxerpeko Itsastarrak eta Herrerako Mendizaleak mendi taldeek irteera hirukoitza antolatu dute datorren asteburu luzerako, Asturiasko printzerrira.
Horra hor egunez eguneko proposamenak:
- Hilak 23, larunbata. Ekialdeko kostaldea, ibilaldia.
- Hilak 24, igandea. Peña Mea (1.557 metro).
- Hilak 25, astelehena. Cuyargayos tontorra (1.391 metro).
Lehen eguneko ibilaldia Asturiasko ekialdeko kostaldeko itsas bazterretik egingo dute. 9 kilometroko ibilbidea izango da, 4 orduko iraupenarekin, gutxi gorabehera.
Igandekoari dagokionez, 14,5 kilometroko bidea egingo dute Peña Meara heldu nahi dutenek, 6 ordu baino gutxiagoan. 922 metroko desnibel positiboa du mendiak.
Asteleheneko tontorra da desnibel positibo handiena duena (941 metro), baina laburragoa da bide hori aurreko egunekoa baino, 5 ordutan bukatzea aurreikusi baitute antolatzaileek. Orotara 12,4 kilometro dira.
Irteerarekin bat egin nahi dutenak larunbatean, 06:30ean, abiatuko dira Trintxerpetik, mendi taldeek prestaturiko autobusean. Bazkideek 125 euro ordaindu beharko dituzte gastuei aurre egiteko, eta 10 euro gehiago bazkide ez direnek.
Izena emateko, edota hitzorduari buruzko xehetasunak jakiteko, posta elektroniko bidez jar daiteke harremanetan Itsastarrak Mendi Taldearekin.
