[Bideoa eta argazki galeria] Txikiak handiak dira
Mila Koloretako Txupinazo Txikia egin dute 18:00etan herriko haurrek. Haurren Jai Batzordearen ekimenez, lehen koloreak txikienek jarri dituzte.
Zer da handi? Zer da txiki? Norenak dira jaiak? Norbait al da madalenen jabe? Bada, gaur arratsaldean ikusitakoaren arabera, haurrenak ere badira jaiak. Horrela erabaki zuten Haurren Jai Batzordean, eta horrela egikaritu dute gaur arratsaldean. Mila Koloretako Txupinazo Txikia egin dute.
Lehenik, trumoiak banatzen atera dira Zumarditik haurrak. Batukada taldearekin batera, esan dute: ‘Ei. Hemen gaude. Jaiak eta kaleak gureak dira ere bai’. Esan eta egin. Burrunbadan zeharkatu dituzte zentroko kaleak haurrek (eta ondo-ondoan zihoazen sakelako telefonodun guraso eta laguntzaileek), eta txintxo arraio iritsi dira Koldo Mitxelena plazara.
Han, haien jaien hasierako ekitaldia. Plazaren erdi-erdian jarri dira txikiak, eta hainbat ordezkarik den-denei jai oparo eta zoriontsuak opa ondoren, atzera kontaketa hasi da. ‘Hamar, bederatzi, zortzi, zazpi…’; zenbaki eta zenbaki artean, txaloa. Zerora iristerakoan eromena. Txupinazo txikiko abestia jarri, eta zerutik mila kolore jaisten hasi dira globoen, zinten eta baloi handien formarekin. Haien bila joan dira azkar batean haurrak. Kaos txikia Koldo Mitxelenan. Txikiak handiak dira.
Jarraian, Mila Koloretako Txupinazoaren hainbat une, eta bideoa:
