Zenbat egiten da euskaraz Oiartzunen?
2021eko datuen arabera, belaunaldi gazteenetan egiten da euskararen erabilera oparoena. Auzokako edo 2016 geroztiko datuak ere argitaratu dira.
Oiartzungo euskararen erabileraren datuak argitaratu dituzte. Oiartzungo Udalak herriko euskararen erabileraren zenbatekoak argitaratu ditu, Soziolinguistika Klusterrak eskuratutako datuak oinarri. Izan ere, klusterrak 2021eko udazkenean Euskal Herriko 135 udalerritan egin zituen hizkuntzen erabileraren kale-neurketak, eta datu orokorrekin txosten bat argitaratu zuen.
Datuok oinarri, udalak laburpena egin eta zenbait aldagaien emaitzak plazaratu ditu (denak kalean): euskararen ezagutzaren zenbatekoa; kaleko erabilera eta azken urteetako bilakaera; erabilera, adin tarteen arabera; eta, bukatzeko, auzoen araberako erabilera.
Euskararen ezagutza, hasteko, % 76,3an kokatuko litzateke; % 12,6a erdalduna; eta % 11,2a “ia euskalduna”. Udalak datuak jakinarazi aurretik egindako galdeketa batean, % 80tik gora kokatu dute herritarrek.
Kaleko erabilera eta azken urteetako bilakaerari dagokionez, lehenengoan % 53,3an kokatu da euskara, eta % 46,1a gaztelania (frantsesa % 0,1a, eta “beste hizkuntzak” % 0,6); eta bigarrenean (2016-2021 urteen arteko bilakaera), % 5,5 puntu jaitsi da euskararen bilakaera, gaztelaniarena % 5,9a igo den bitartean.
Adinei erreparatuz, hauek dira emaitzak: 2-14 urte bitartekoen artean % 73,8ak egiten du euskaraz, eta % 26ak gaztelaniaz; 15-24 urte bitarteko gazteen % 63ak egiten du euskaraz, eta % 36,6ak gaztelaniaz. Heldu gazteen artean (25-44 urte), euskaraz egiten du % 57,6ak, eta % 40,8ak gaztelaniaz. Heldu nagusien artean (45-64 urte), egoera irauli eta gaztelera da nagusi (% 64,7ak egiten du, euskaraz dabilen % 34,6aren aurrean). Bukatzeko, adinekoen artean (65 urtetik aurrera) gaztelera da nagusi ere: % 57,8ak egiten du gaztelaniaz, eta ia % 42ak euskaraz.
Auzoei dagokienean, euskara gehien entzuten denetik gutxienera, hauek dira emaitzak: Elizalden % 76,7; Iturriotzen %65,6; Altzibarren %57,3; Gurutze Karrika eta Ergoienen %52,6; Ugaldetxon % 49 eta Arraguan % 18 baina gutxiago.
Oiartzungo Udalaren laburpen bideoa, hemen sakatuta ikusi daiteke.
