[Bideoa] Atxilotu bat Antxon, kotxe bati su eman eta familia mehatxatzeagatik
Luzuriaga inguruan aparkatutako ibilgailu bati su eman eta bertako etxebizitzetan bizi diren senideak barruan atxikitzea egotzi diote.
![](https://oarsoaldea.hitza.eus/site/files/2022/07/whatsapp-image-2022-07-27-at-11-31-34-am.jpeg)
Ertzaintzak aditzera eman duenez, joan den goizaldeko hiruak aldera Pasai Antxoko bizilagun batek bertako Luzuriaga inguruan aparkatuta zegoen auto batek su hartu zuela ohartarazi zion poliziari. Horren jakitun, ertzainak eta suhiltzaileak gertaeren tokira bertaratu ziren.
Sutan zegoen kotxearekin ez ezik, Errenteria-Oreretako Ertzaintzaren hitzetan, indarkeria matxistarekin lotura izan lezakeen gorabehera batekin topo egin zuten agenteek. Haiek azaldutakoaren arabera, 38 urteko gizonezko batek emaztearekin eztabaida izan zuen etxe barruan eta, ondoren, kalera irten eta bikotekidearen senide baten ibilgailuari su eman zion.
Ertzaintzak adierazitakoaren arabera, aipaturiko ibilgailuari nahita eman zion su 38 urteko gizonezkoak. Ibilgailuari su eman eta gero gertaturikoa azaldu dute agenteek: “Etxebizitzara itzuli, eta bertara sartzeko asmoz, zerra erradial batez moztu du atea”.
Bizitokira sartu ezinik zegoenez gero, eraikineko beste etxebizitza batera joan omen zen gizona, eta zenbait senide atxiki zituen barruan. “Bizkor taldea iritsi [Ertzaintzaren berehalako erantzunerako taldea da], eta inplikatuekin hitz egin duenean, pertsonak bertan behera utzi du bere jarrera eta poliziaren esku utzi du bere burua”, azaldu dute ertzainek.
Gizonezkoa atxilotu dute, familiari egindako mehatxuen eta hertsapenen ustezko delituak egotzita, eta ibilgailuari eragindako kalteengatik. Ertzaintzak baieztatu du indarkeria matxista egon zela tartean. Atxilotua polizia dependentzietara eraman dute beharrezko eginbideak hasteko, eta ondoren, Donostiako Guardiako Epaitegira eramango dute.