Gaueko Xorrola eskainiko dute xanistebanetan
Orduero eskainiko du zerbitzu berezia udalak, eta Oiartzungo zazpi auzoetara iritsiko da. Segurtasun neurriak hobetzea da helburua.
![](https://oarsoaldea.hitza.eus/site/files/2022/07/xorroxola-berezia-xanistebanak.jpg)
Oiartzungo Udalak Xorrola berezia eskainiko du xanistebanetako gauetan zehar. Autobus zerbitzu berezi hau herriko zortzi auzoetara iritsiko da festetako bost gauetan, gauerdiko 00:00ak eta goizaldeko 06:00ak artean. Orduero abiatuko da, eta bi euro balioko ditu.
Udalaren helburua, horrela, segurtasuna hobetzearena da. Besteak beste, alkohola kontsumitu dutenek autoa hartu ez dezaten eta emakumezkoak segurtasun handiagoarekin etxera itzultzeko aukera eduki dezaten hartu du erabakia.
Ibilbideari dagokionez, liburutegi ondoko autobus geltokitik abiatuko da eta herriko plazatik urrutien dauden auzoetara joango da lehenengo. Hau izango da ibilbidea:
- Elizalde (irteera): liburutegi ondoko geltokia.
- Gurutze: Bizardia plazako autobus geltokia.
- Ergoien: Tornola kaleko autobus geltokia.
- Altzibar: Zokoloko zubia.
- Karrika: plazako autobus geltokia.
- Iturriotz: Beko soro pareko autobus geltokia.
- Ibarre: gasolindegiko geltokia.
- Elizalde: Pikabeneko geltokia.
- Ugaldetxo: Intxixu pareko autobus geltokia.
- Arragua: Lartzabal etxadiko geltokia.
- Mendin: frontoi gaineko geltokia.
Beste alde batetik, ohiko Xorrolaren ordutegia ere zabalagoa izango da xanistebanetan zehar: goizeko 07:10etan hasi eta 22:40etan bukatuko da, Arraguan. Geltokietan ere aldaketak izango dira: kale mozketak direla eta, Manuel Lekuona etorbidekoa (anbulatorioan) eta Yon Oñatibiako geltokiak ezabatuko dira. Horiek Rafael Pikabea eta Landetxera (aparkaleku sarrera parera) pasatuko dituzte.