Udalak madalenen balorazio baikorra egin du
Madalenak bukatuta, udalak jaien gaineko balorazio "positiboa" egin, eta herritarrek herriarekiko duten konpromisoa goraipatu du.
![](https://oarsoaldea.hitza.eus/site/files/2022/07/kuadrilen-eguna.jpg)
Madalenak bukatuta, Errenteriako Udalak herriko jaien gaineko balorazio “positiboa” egin du.
Lehenik eta behin, eskerrak eman nahi izan dizkie madalenak bi urteren ondoren berriro ospatzeko “lanean aritu diren eragile eta herritar guztiei, euren ahalegin eta inplikazioari esker izan baita jaiez gozatzeko aukera”.
Jaiek iraun duten denboran, “adin guztietarako herritarrei zuzendutako ehunka ekintzatik gora” izan direla goraipatu dute, denak “giro ederrean” gauzatu direla azpimarratuz. Ekintza horien guztien lekuko diren argazkiak herritarren eskura jarri dituzte dagoeneko.
Herritarren parte hartzeari ere erreferentzia egin nahi izan diote udaletik: “Errenteriarrek herriko kaleak hartu dituzte eta gogoz eta ilusioz erantzun diote jai giroari”.
Horrez gain, udal ordezkariek “herritarrek herri honekin eta elkarrekiko duten konpromisoa berritzeko egunak direla argi geratu” dela zehaztu dute. Gainera, gehitu dute, “herri moduan jaiak berdintasunean eta aniztasunean ospatzeko nahia nabarmena” izan dela eta hori guztia “benetan pozgarria” dela.
Bukatzeko, festarako eta atsedenerako eskubideak uztartzeko “zailtasunen” aurrean herritarrek erakutsi duten “ulermena” balioan jarri nahi izan dute udal ordezkariek.