Errenteriako pala taldea, txapeldun Euskadiko Herriartekoan
Talde bakoitzak garaipen bat lortu bazuen ere, lau tantoko aldearengatik nagusitu ziren finalean errenteriarrak.
Errenteriako pala taldea Maite Gartziarekin. Errenteriako pala taldeak egin duen sasoi bikaina borobildu zuen atzo Euskadiko Herriarteko Pala Txapelketa bereganatuta. Gipuzkoako Herriartekoan egin bezala, Eskisabelek, Rubenek, Yorelek eta Abelek osatzen duten taldeak Bizkaiko txapeldun izan zen Armintzako taldea garaitu zuen Gasteizko Lakua pilotalekuan jokatu zuren finaletan, eta Euskadiko Herriarteko Pala Txapelketako txapeldun berriak dira. Final handian Estefano izan zen errenteriarrek izan zuten ordezko palista.
Larruzko paletako modalitatean, Eskisabelek eta Rubenek oso partida serioa jokatu zuten eta nagusitasunez garaitu zituzten Armintzako Unda eta Madariaga (35-17). Errenteriako bikoteak norgehiagoka bikaina jokatu zuen, hasieratik finalean erabat sartuta, eta aurkariak aukera gabe utzi zituzten.
Pala motzean, berriz, Yorelek eta Abelek ezin izan zuten Menak eta Imanolek osatutako bikotea menderatu, eta 26-40 galdu zuten. Talde bakoitzak garaipen batekin bukatu zuen Euskadiko Herriartekoaren finala, baina markagailua berdinduta geratu arren, lau tantoko aldearengatik nagusitu da Errenteriako taldea. Lehen partida 18 tantoko aldearengatik irabazi, eta bigarrena, 14gatik galdu zuten errenteriarrek. Lau tanto aldeko abantaila horrek eman die Euskadiko Herriartekoa.
Gasteizko final handietan Maite Gartzia Kultura eta Kirol zinegotzia egon zen Errenteriako pala taldea harmailetan babesten, eta herriko pilotariekin batera jaso zuen txapeldunen trofeoa.
