Ander Iñarra, hirugarren Louzan Skyrace lasterketan
Joan den asteburuan, Munduko Kopako beste lasterketa bat lehiatu zuen mendi lasterkariak, Portugalen. Finalean da lezoarra.
Ander Iñarra gizonezko podiumean (eskuinetik hasita, hirugarrena). Argazkia: Louzan Skyrace Ander Iñarra mendi lasterkari lezoarrak aurrera darrai mendi lasterketen Skyrunning modalitateko Munduko Kopan. Joan den asteburuan, igandean, Louzan Skyrace lasterketan lehiatu zen, Lousan (Portugal). Ibilbide gogor bati egin behar izan zieten aurre korrikalariek: 25 kilometrotan 2.250 metro igo behar izan zituzten.
Ohi moduan, Iñarrak atzekoz aurrerako lasterketa egin zuen: igoeran lehen bosten artean heldu bazen ere gailurrera, beheranzkoan denbora berreskuratu eta hirugarren iritsi zen helmugara, 02:41:01-ko denborarekin.
Munduko Koparen zirkuituko azken aurreko lasterketa izan zen asteburukoa. Hala, lau lasterketa beteta eta dagozkion puntuak eskuratuta, datorren urriaren 8an kopako finalean egongo da. Etxeko lanak eginda, Zeanuritik (Bizkaia) abiatuko den Gorbeia Suzien lasterketa gogor prestatu beharko du datozen asteotan, 31 kilometroko ibilbideari eta 2.400 metroko desnibelari aurre egiteko.
Euskaldunak, sasoi betean
Aurretik Juan Oller portugaldarra (02:37:18-ko denbora eta lasterketako errekorra) eta Ismail Razga santurtziarra (02:39:09) izan zituen Iñarrak. Maila bikaina erakutsi zuten euskaldunek, Markel Urigoitia eta Aitor Ajuria otxandioarrak laugarren (02:43:32) eta bosgarren (02:44:36) izan ziren helmugan, hurrenez hurren. Ainara Urrutia durangarra bigarren izan zen emakumezkoetan, 03:12:10-ko denborarekin.
