Altzibarko fusilamenduen 86. urteurrena bete da
86 urte bete dira 1936ko irailaren 7an Domingo eta Segundo oiartzuarrak fusilatu zituztenetik. Fusilamenduen harira, Iosu Mitxelenak ilustrazioa egin du.
Iosu Mitxelenak egin duen ilustrazioa. 86 urte pasa dira 1936ko irailaren 7an Domingo Belaunzaran Zapirain eta Segundo Lekuona Albistur oiartzuarrak Altzibarko Klarene plazan fusilatu zituztenetik.
Kattin Txiki elkartetik azaldu duten moduan, Francoren tropak 1936ko uztailaren 23an sartu ziren Oiartzunen. Domingo eta Segundo Iyeru baserrira hurbildu ziren suak hartu zuela jakinda eraikina nola geratu zen ikustera. Ibilbide horretan, Barrios koronela bizi zen etxe aurretik pasa ziren, eta koronelaren etxetik iratzargailu bat lapurtu zutela egotzi zitzaien.
Berehalako epaiketa baten ondorioz, bi oiartzuarrak heriotza zigorrera zigortu zituzten. Domingo eta Segundo Altzibarren fusilatu zituzten, oiartzuarren aurrean, herri osoa deitu baitzuten fusilamenduak ikustera. Kattin Txikitik jakinarazi dutenez, Klarene plaza jendez bete zuten, eta 1936ko gerran gertatutako fusilamendu “latz eta gordinetakoa” izan zen, “jendearen aurrean” gauzatu zelako.
Segundok eta Domingok ez zuten lapurreta horrekin zerikusirik izan, baina “abertzaleen semei beldurra sartu” behar zitzaiela eta “mendekuaren biktimak” izan zirela zehaztu dute elkartetik.
Fusilamendu horien harira, Iosu Mitxelenak duela 86 urte jazotako fusilamenduen ilustrazioa egin du.
