Matrikulazio kanpaina abiatu dute Pasaiako bi euskaltegiek
Antxoko Txirrita AEK eta Trintxerpeko Udal Euskaltegiak '¡Hazlo tuyo!' leloa aukeratu dute 2022-2023 ikasturteko matrikulazio kanpainarako.
Pasaiako Udalak herriko bi euskaltegiekin elkarlanean landu duen aurtengo matrikulazio kanpaina aurkeztu dute gaurkoan, ¡Hazlo tuyo! lelopean. Hala, datorren 2022-2023 ikasturterako izen-ematea ireki dute dagoeneko Antxoko Txirrita AEK eta Trintxerpeko Udal Euskaltegiak.
Prentsaurrekoan zehar, pasaitarrei euskara bere egin eta ikasteaz gain, balio anitzeko ekintza izan daitekeela azpimarratu du Loreto Osa zinegotziak: euskara ikastea funtsezkoa izan daitekeela lana topatzeko, bezeroei kalitate handiagoko zerbitzua eskaintzeko, euskarazko titulu ofizial bat lortzeko, euskal kultura bete-betean gozatzeko edota seme-alabekin eskolan ikasitakoa partekatzeko, hala nola.
Txirrita AEKko zuzendari Udane Migeltorenak pasaitarrei lehen urrats hori ematera bultzatu ditu, eta aukera berdintasuna izango dutela euskaraz ez dakiten herritarrek. Hortaz gain, matrikulazio garairako baldintza ekonomikoak azaldu ditu: “batetik, langabetuek, Diru-sarrerak Bermatzeko Errenta kobratzen dutenek eta Giza Larrialdietarako Laguntza jasotzen dutenek matrikularen % 20 bakarrik ordaindu beharko dute ikasturte hasieran, eta eskola-orduen % 85era baino gehiagora bertaratuz gero, Udalak kopuru hori ere itzuliko die ikasturte amaieran”. Argi utzi nahi izan dute klaseetara bertaratzen ez diren ikasleek udalak aurreratutako dirua itzuli araziko diela, salbuespenak salbuespen.
Susana Garro udal euskaltegiko zuzendariak gurasoei bideratutako kanpaina berezia jarri du mahai gainean: haiei egokitutako egutegi nahiz ordutegia antolatuko dutela aurreratu du, seme-alaben ikastegietan. Muga ekonomikoa ez dadin, Garrok gurasoek ikasturte hasieran 32 eta 160 euro bitarte ordaindu beharko dituztela adierazi du; norberaren egoera ekonomikoaren eta ikasi beharreko euskara mailaren arabera.
Ikastaroei dagokienez, aurreko urteetako ikastaro berezien eskaintza mantenduko dutela adierazi du Osak: mintzamena lantzeko ikastaroak, Pasaiako merkatarientzako, langabetuentzako ikastaro trinkoak edota euskara online ikasi nahi dutenentzako saioak antolatuko dituzte. Ikastaro horiei buruzko informazio osoa euskaltegietara deituta edo bertara gerturatuta lortu ahal izango dute herritarrek.
Ikastaro berezi horietaz gain, euskaltegiek ohiko ikastaroak eskaintzen jarraituko dute urritik ekainera, goizeko 07:00etatik gaueko 21:00ak arte. Ikastaro guztiak 16 urtetik gorakoentzat dira. 2 orduko eskolak izaten dira astelehenetik ostegunera.
Informazioa eskuratzeko nahiz izena emateko:
- Trintxerpeko Udal euskaltegia: 943 004 340 telefonoa, mezua helbide honetara bidalita, edo egoitzara bertaratuta.
- Antxoko Txirrita AEK: 943 525 545 telefonoa, mezua helbide honetara bidalita, edo egoitzara bertaratuta.
