Aurtengo Emakumeentzako Jabekuntza Eskola aurkeztu dute
Udazkenean abiatuko da, eta orotariko gaiak landuko dituzte aurten. Ikastaro luzeez gain, tailer laburrak antolatuko dituzte.
Natasha, Izaskun Barbier, Malen Aldalur, Loreto Osa, Clara Barbier eta Cris Lopez.. Pasaiako Udalak aurtengo Emakumeentzako Jabekuntza Eskolaren ikastaro berria aurkeztu du. Emakumeen ahalduntzea, autonomiaren garapena eta osasunaren alde egitea izango ditu helburu udazkenean abiatuko den ikastaroak. Bukaerako proposamena iazko eskolako parte hartzaileen eta Berdintasun Mahaiko kideen proposamen eta ebaluazioaren bidez adostu da.
Aurten, esaterako, ohiko ikastaro luzeez gain, egun bat edo bi iraungo dituzten hainbat tailer labur antolatuko dituzte. Horien artean egongo dira mikromatxismoak, indarkeria matxista, maitasuna zein autodefentsa feministari buruzkoak. Loreto Osa Berdintasun zinegotziaren eta Malen Aldalur teknikariaren arabera, beste profil batengana heldu nahi dute horrela; aurreko urteko parte hartzea mantentzeaz gain. Iaz, 200 parte hartzaile inguruk osatu zuten Jabekuntza Eskola.
Tailer labur horietaz gain, udalak ikastaro luzeagoak antolatuko ditu ere. Formatu horri helduko diote Mindfullness edo autoestimua eta konfiantzari buruzkoek. Aurtengo berrikuntzen artean egongo da “Zoru pelbikoa eta sexualitatea” deituriko ikastaroa. Saio horietan, hainbat diziplina landuko dituzte emakumeen sexualitateaz gain: kontzientzia, antropologia, kultura, baita anatomia ere. Aurreratu dutenaren arabera, literatura feminista landuko dute ere.
Jabekuntza Eskola ez da Pasaian emakumeek haien eguneroko kezkei heltzeko duten talde bakarra. Izan ere, Pasaian egonkortu eta zabaldu dira dagoeneko jatorri askotariko emakumeen taldea, indarkeria matxistari aurre egin dioten emakumeentzako autolaguntza taldea, ongi zaintzen eta maitatzen ikasteko taldea eta emakume korrikalariena.
Emakumeen artean saretzeko guneak eraikitzera egin dute dei Jabekuntza Eskolako kideek.
Programa osoa hemen kontsulta daiteke.
